ԵՐԵՎԱՆ, 9 մայիսի — Sputnik. «Ռոսիա Սեգոդնյա» ՄՏԳ-ի գլխավոր խմբագիր Մարգարիտա Սիմոնյանը ներկա կլինի Մոսկվայի ռազմական շքերթին, իսկ երեկոյան ընկերների հետ կնշի Հաղթանակի օրը։
«Հիմա կգնամ շքերթ, իսկ երեկոյան տանը ընկերներիս հետ խորոված կանենք և Հաղթանակի երգեր կլսենք։ Իսկ մեր երեխաները կհիշեն այդ երգերի բառերը», — գրել է Սիմոնյանն իր տելեգրամ-ալիքում։
Նա նշել է, որ այդ օրը հարազատների և մտերիմների հետ կհիշի իր նախնիներին, որոնք պայքարել են ընդհանուր հաղթանակի համար։
«Կհիշենք իմ պապին` Սարգիս Սիմոնյանին, որն անցել է ամբողջ պատերազմով, և նրա մորն ու քրոջը` Նարտուհի և Ռայա Ներսիսյաններին, որոնք պարտիզաններ են եղել Ղրիում», — գրել է Սիմոնյանը։
Սիմոնյանը գրել է նաև մյուս պապի` Ադամ Մարգարյանի մասին, որը վիրավորվել է Ստալինգրադի մոտ, նրա եղբոր` տանկիստ Արամ Մարգարյանին, որի պատվին Ադլերում` նրա հայրենի գյուղում, փողոց են անվանել։ Նրա տատը` Գեղեցիկ Դեմիրճյանը, 14 տարեկանում գիշեր-ցերեկ ծխախոտ է աճեցրել ռազմաճակատի համար։ Նախապապը` Գրիգորի Ալոևը, վիրավորվել է Ղրիմում, իսկ նրա դուստրը` Մայա Ալոևան, 9 տարեկանում կերակրել է ամբողջ ընտանիքին։
«Իմ և մյուսների նախնիներ, որոնք հաղթել են մեզ համար, ես հիշում եմ ձեզ, սիրում և խոնարհվում եմ ձեր առաջ», — գրել է Սիմոնյանը։
Նա նաև նշել է, որ անցած տարի մայիսյան տոներին նրա ամուսնու` Տիգրան Քեոսայանի ընկերները փառահեղ ճանապարհորդություն են կազմակերպել Հայաստան։ Ուղևորությունը կազմակերպել են հատուկ Սիմոնյանի համար, որպեսզի նա տեսնի պատմական հայրենիքը։
«Հաղթանակի օրը մենք նստած էինք հյուրանոցի նախասրահում և Հաղթանակի երգեր էինք լսում։ Մեզ ձայնակցում էին ռուս զբոսաշրջիկները և հյուրանոցի անձնակազմը», — հիշում է Սիմոնյանն անցած տարվա ուղևորությունը։
Մինչև այդ նա Հայաստանում եղել էր ընդամենը մեկ անգամ Ռուսաստանի նախագահ Վլադիմիր Պուտինի հետ և ոչ մի բան չէր հասցրել տեսնել։