ԵՐԵՎԱՆ, 9 մայիսի — Sputnik. ԵՄ արտաքին գործերի գերագույն հանձնակատար Ֆեդերիկա Մոգերինին հեռախոսազրույցի ժամանակ շնորհավորել է Նիկոլ Փաշինյանին ՀՀ վարչապետի պաշտոնում ընտրվելու կապակցությամբ, ինչպես նաև հրավիրել է նրան առաջին իսկ հնարավորության դեպքում Բրյուսել այցելել։ Այս մասին հայտնում է եվրոպական արտաքին քաղաքական ծառայությունը։
«Կողմերը նշել են ԵՄ-ի և Հայաստանի միջև գործընկերության կարևորությունը և ընդգծել, որ անհամբերությամբ են սպասում անձնական հանդիպմանը: ԵՄ դիվանագիտության ղեկավարը վարչապետին հրավիրել է առաջին իսկ հնարավորության դեպքում Բրյուսել այցելել», — գրված է հաղորդագրության մեջ։
Պաշտոնական անձինք քննարկել են Հայաստանի խորհրդարանի կողմից վարչապետի ընտրությունից հետո հաջորդ քայլերը, ներառյալ կառավարության ապագա կազմավորումը, անդրադարձել են ԵՄ-ի և Հայաստանի միջև կապերի ամրապնդման հետագա հնարավորությանը: Նրանք սեղմ քննարկել են արտաքին քաղաքականության գերակայությունները, այդ թվում՝ Լեռնային Ղարաբաղի հակամարտությունը, որի խաղաղ կարգավորումը, ինչպես հաստատել է Մոգերինին, Եվրամիության համար շարունակում է առաջնահերթ խնդիր մնալ:
Մոգերինին նշել է, որ վարչապետ Փաշինյանի և ապագայում նրա կառավարության հետ համագործակցություն է ակնկալում:
Հիշեցնենք, որ մայիսի 8-ին Նիկոլ Փաշինյանը ՀՀ վարչապետ ընտրվեց։