ԵՐԵՎԱՆ, 5 մայիսի — Sputnik. Հայերը չեն կորցնի կոնյակի մշակույթը, քանի որ այն վաղուց դարձել է երկրի պատմության մասը, իսկ հայկական գինին դանդաղ, բայց հաստատուն քայլերով ընդգրկվում է համաշխարհային միտումներ ցանկում։ Այս մասին Sputnik Արմենիա ռադիոկայանի եթերում ասաց ռուս հաղորդավար, ռեստորատոր և բրենդ-շեֆ Գայանե Բրեիովան։
Նրա կարծիքով՝ հայկական արտադրանքը և խոհանոցը մրցունակ են, հայերը կարող են ռուս շեֆ խոհարարներին խորհուրդ տալ օգտագործել իրենց մթերքները։
«Առավել ևս, որ երկրները (Հայաստանը և Ռուսաստանը՝ խմբ․) կարող են ներկրել միմյանց արտադրանքն առանց տուրքի։ Ռուս սոմելյեները հայկական գինիներն ուրախությամբ օգտագործում են իրենց գինու քարտեզներում», — նշեց Բրեիովան։
Նրա խոսքով, եթե Վրաստանն աշխատում է գինիների քանակի վրա, ապա հայերն արտադրում են հիրավի յուրահատուկ գինիներ։
Բրեիովան կարծում է, որ Հայաստանում զբոսաշրջությունը պետք է զարգանա հենց գինու արդյունաբերության շնորհիվ։
«Արենի փառատոն» հիմնադրամի տնօրեն Նունե Մանուկյանն էլ Sputnik Արմենիային պատմեց Երևանում անցկացվող գինու տոնի՝ «Երևանի գինու օրերի» մասին։ Միջոցառման ամսաթիվը մայիսի 4-5-ից տեղափոխվել է մայիսի 11-12։
«Անցած տարի ավելի շատ արդյունք ստացանք, քան ակնկալում էինք։ Դա առաջին անգամ էր, մենք մտածում էինք, որ այցելուներն ավելի քիչ կլինեն։ Արձագանքները շատ դրական էին, շատերն այս տարի անհամբերությամբ սպասում են գինու օրերին», — նշեց նա։
Միջոցառման նպատակը հայկական գինու քարոզչությունն է։ Գինու օրերն անցկացվում են մայիսին, քանի որ դա լավ շրջան է, մասնավորապես, ռուսական շուկայի ներկայացուցիչների ուշադրությունը գրավելու համար, նշեց Մանուկյանը։
Այս տարի միջոցառմանը միացել են հինգ նոր արտադրողներ, և նրանք բոլորն Արցախից են, և հիմա կարելի է համտեսել 27 գինեգործների գինիներ։
«Համտեսի արժեքը 4000 դրամ է (յուրաքանչյուր տաղավարի մոտ 1 անգամ)։ Այս տարի միջոցառումը նվիրված է Երևանի 2800-ամյակին։ Կարծում եմ՝ քիչ քաղաքներ կան, որոնք կարող են հպարտանալ գինեգործության 2800-ամյա պատմությամբ», — ասաց փորձագետը։
Մանուկյանի խոսքով՝ գինու հանդեպ սերը հանգեցնում է երկրում պանրագործության զարգացմանը, քանի որ Հայաստանում պանրի բազմազան տեսակներ կան։
Հիշեցնենք, որ «Երևանի գինու օրերը» տեղափոխվել էին Հայաստանում անցկացվող բողոքի ակցիաների պատճառով։