ԵՐԵՎԱՆ, 1 մայիսի — Sputnik. «Լուդինգ» ընկերությունների խմբի (գինու խոշորագույն ներկրող) համասեփականատեր Արթուր Վարժապետյանի կինն ամուսնուց 50 մլն դոլարի ակտիվներ է պահանջել բաժանման համար։ Այս մասին հայտնում է ՌԲԿ-ն։
Սակայն իրավաբաններն արդեն բացատրել են Աննա Շահնազարովային` Վարժապետյանի կնոջը, որ ռուսական դատարանների պրակտիկան հաշվի առնելով` դատական կերպով ընկերությունից նման մասնաբաժին վերցնելու հավանականությունն այդքան էլ մեծ չէ։
«Ռուսաստանում գինու խոշորագույն ներկրողի ակտիվներին առնչվող ամուսնալուծության գործընթացը մեկնարկում է Մոսկվայի Դորոգոմիլովսկի դատարանում։ Աննա Շահնազարովան ամուսնալուծության վերաբերյալ հայց է ներկայացրել», — գրում է պարբերականը։
Ամուսիններին չի հաջողվել ընտանեկան ակտիվները բաժանելու վերաբերյալ փոխհամաձայնություն ձեռք բերել դատական գործընթացից առաջ, պնդում են կողմերի փաստաբանները։ Ի դեպ, գույքի բաժանումը դժվար կլինի, քանի որ համատեղ ձեռք բերված գույքի ցանկում են Ռուսաստանում, Ֆրանսիայում, Շվեյցարիայում և ԱՄՆ-ում գտնվող մի քանի անշարժ օբյեկտներն ու արտասահմանյան թանկարժեք ավտոմեքենաները։
Պատասխան հայցադիմումի մեջ, որը Մոսկվայի դատարան է ներկայացրել Արթուր Վարժապետյանը, նշվում է, որ հայցորդն անշարժ և շարժական գույքը բաժանելու վերաբերյալ առարկություն չունի։
Սակայն Արթուր Վարժապետյանը խնդրում է միանձնյա պահպանել սեփականության իր իրավունքը իրեն պատկանող ընկերությունների մասնաբաժինների համար։ Ամուսիններին ընկերության բաժնետոմսերի կեսը շնորհելու ճանապարհով մասնաբաժինների բաժանումը խախտելու է հասարակության իրավունքը, գրված է հայցում։
Այդպիսով` ընկերության մեկ քառորդ մասը, որը Շահնազարովան փորձում է դատական կարգով վերցնել ամուսնուց, մոտ 575 մլն ռուբլի արժե (9.3 մլն դոլար)։