ԵՐԵՎԱՆ, 30 ապրիլի — Sputnik. ՀՀ վարչապետ ընտրվելուց հետո Նիկոլ Փաշինյանը ՀՀ արտաքին քաղաքականության վեկտորը չի փոխի։ Այս մասին նա քիչ առաջ հայտարարեց ՀՀԿ խմբակցության հետ հանդիպման ժամանակ։
ՀՀԿ պատգամավորների հարցերը հիմնականում վերաբերում էին ԵԱՏՄ-ին և ՀԱՊԿ-ին անդամակցելու թեմային ու Ռուսաստանի հետ հարաբերություններին։ Հանրապետական պատգամավորները մեջբերումներ արեցին Փաշինյանի նախկին ելույթներից, որոնցում նա քննադատել էր Հայաստանի անդամակցությունն այս կառույցներին։
Ի պատասխան Նիկոլ Փաշինյանը վերահաստատեց նախկինում արած հայտարարությունը, որ մի դեպքում դրանք արվել են ընդդիմության դիրքերից, այս պահին ինքն առաջնորդվում է պետության շահով։
«Երբ դու ընդդիմություն ես, ընդդիմությունը այլ հնարավորություն չունի նույն այդ կառույցներում առկա խնդիրները բարձրաձայնելու։ Երբ դու իշխանություն ես, դու հնարավորություն ունես բոլոր խնդիրները բարձրացնելու հենց այդ կառույցների ձևաչափում ու անդամ երկրների ներկայացուցիչների հետ»,- ասաց Փաշինյանը։
Ինչ վերաբերում է ԵՄ-ի հետ հարաբերություններին, Փաշինյանն այս հարցում էլ նշեց, որ Հայաստանը սկսած գործընթացից հետքայլ չի անելու։
«Մենք այսօր ունենք քաղաքական նոր իրողություն, և ցանկացած պետական գործիչ պիտի հաշվի նստի այդ իրողությունների հետ և իր գործունեությունն իրականացնի ելնելով պետական շահից»,- ասաց Փաշինյանը։
Նա նշեց, որ Հայաստանը պետք է զարգացնի հարաբերությունները բոլոր գործընկերների հետ, բայց դա չպիտի անի ի հաշիվ մեկը մյուսի։