ԵՐԵՎԱՆ, 30 ապրիլի — Sputnik. ԵԱՏՄ–ի անդամ լինելը համապատասխանում է Հայաստանի հիմնական շահերին։ Այս մասին հայտարարել է ՀՀ նախագահ Արմեն Սարգսյանը «Բելառուս 1» հեռուստաալիքին տված հարցազրույցում։
«Մեզ համար եվրասիական համագործակցությունը ընկերային հարթակ է։ Այս կառույցում եղբայրական երկրներ են։ Սա ոչ միայն հին բարեկամություն է, այլ մեծ շուկա Հայաստանի համար»,–ասել է Սարգսյանը հարցազրույցի ժամանակ։
Նրա խոսքով` ԵԱՏՄ–ի անդամակցությունը բխում է Հայաստանի հիմնական շահերից։ «Մենք այնտեղ ենք, որովհետև դա մեզ պետք է, ոչ թե որովհետև մեզ «տարել» են այնտեղ»,–ասել է ՀՀ նախագահը` պատասխանելով երկրում տեղի ունեցող ներքաղաքական փոփոխությունների հիման վրա արտաքին վեկտորի փոփոխության մասին հարցին, որն ավելի շատ վերաբերում էր ԵԱՏՄ–ին և ՀԱՊԿ–ին։
Եվրասիական միությունը տնտեսական բլոկ է։ Ներկա պահին ԵԱՏՄ անդամ են Հայաստանը, Ռուսաստանը, Բելառուսը, Ղազախստանն ու Ղրղըզստանը։