ԵՐԵՎԱՆ, 28 ապրիլի— Sputnik. Նիկոլ Փաշինյանին ՀՀԿ–ի վարչապետի թեկնածու չառաջադրելու որոշումը չի ոգևորել։ Այս մասին նա հայտարարեց Վանաձորում կայացած հանրահավաքի ժամանակ։
«Սա վատ չէ, լավ էլ չէ։ Կարծում եմ` ճիշտ կլինի ՀՀԿ-ն հայտարարի, որ այլ խմբակցությունների հետ համատեղ վարչապետի թեկնածու է առաջադրելու ժողովրդի թեկնածուին»,– ասաց նա։
Իսկ եթե մայիսի 1-ին վարչապետ ընտրվեց որևէ մեկը, բայց ոչ ժողովրդի թեկնածուն, Փաշինյանը խոստանում է բողոքի ակցիաները շարունակել տասնապատիկ մեծ ծավալով։
«Ես ուզում եմ շատ հստակ լինել, սա ասել եմ և էլի եմ ասում. ես իլյուզիաներ չունեմ, որպեսզի մտածեմ, թե դուք իմ անունը վանկարկելիս իմ անունն եք վանկարկում, ես հավատում եմ, որ դուք իմ անունը վանկարկելիս ինքներդ ձեր անունն եք վանկարկում, որովհետև ասել և ասում եմ` Հայաստանում հաղթանակած ոչ բռնի հեղափոխությունն ունի մեկ առաջնորդ և այդ մեկ առաջնորդը` դու ես: Ազգային Ժողովի բոլոր խմբակցությունները պարտավոր են աներկբա ձևով քեզ նշանակել ՀՀ վարչապետ»,– ասաց նա:
Փաշինյանը հույս հայտնեց, որ մյուս խմբակցությունները նույնպես կգնահատեն ստեղծված իրավիճակը և կհայտարարեն, որ ոչ միայն թեկնածու չեն առաջադրելու, այլև առանց նախապայմանների պաշտպանելու են ժողովրդի թեկնածուն:
Հիշեցնենք, որ Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։
Հաջորդիվ «Իմ քայլը» նախաձեռնությունը պայքարում էր, որ իշխող ՀՀԿ–ն չառաջադրի վարչապետի իր թեկնածուին։ Ապրիլի 25–ից նրանք կրկին բողոքի ակցիաներ ու հանրահավաքներ են անցկանում ոչ միայն Երևանում, նաև` ՀՀ այլ քաղաքներում։
Ապրիլի 28–ին ՀՀԿ մամուլի քարտուղար Էդուարդ Շարմազանովը հայտարարեց, որ ՀՀԿ խմբակցությունը վարչապապետի իր թեկնածուն չի առաջադրի` երկիրը հետագա ցնցումներից զերծ պահելու համար։