ԵՐԵՎԱՆ, 28 ապրիլի — Sputnik, Արամ Գարեգինյան․ՀՀ Հարկային օրենսգրքի դրույթներից մեկի ազդեցությունն արդեն իսկ քաղաքացիները սկսել են զգալ։ 2018 թվականի առաջին եռամսյակի վիճակագրական տվյալների համաձայն՝ միջին աշխատավարձը Հայաստանում նվազել է։ Նախկինում այն կազմում էր մոտ 180 հազար դրամ, հիմա՝ 170 հազար։ Կարելի է ենթադրել, որ կյանքը վատացել է։ Սակայն պատճառն իրականում այլ է։
Օրեսնգիրքը խստացրել է աշխատակիցներին գրանցելու նկատմամբ պահանջները։ Եթե նախկինում աշխատանքի ընդունելու մասին հայտը կարելի էր ներկայացնել մինչև հաջորդ ամսվա ամսի 20-ը, ապա հիմա ամենաուշը աշխատանքի ընդունելուց մեկ օր առաջ։
Այդ պատճառով եթե նախկինում հարկային տեսուչներին կարելի էր վստահեցնել, որ մեկ ամսից աշխատակիցներին նոր կգրանցեն, ապա այժմ այդ ժամկետը չեղարկվել է։ Եթե ստվերային աշխատակիցների են գտնում, տուգանում են գործատուին։ Այդ պատճառով շատ հաշվապահական ընկերություններ վկայում են՝ բիզնեսն աշխատում է գրանցել աշխատակիցներին գոնե փոքր աշխատավարձով, իսկ մնացած աշխատավարձը ծրարով է տալիս։
Պետբյուջեի համար «սփոփանք»՝ 2018 թվականի առաջին եռամսյակում ավելի շատ եկամտահարկ է ներմուծվել բյուջե։ Թե որքան, հարկայինը մի քանի օրից կճշտի։
Չնայած խստացումներին, ամեն տեղ չէ, որ գրանցում են աշխատակիցներին։ Տաքսիստները, լիցքավորողները, մատուցողները՝ նրանցից շատերը մինչ այժմ «սևով» են աշխատում։ Ընդ որում՝ սեփական համաձայնությամբ։ Ի վերջո նրանք այնքան մեծ գումարներ չեն վաստակում, որ դեռ դրանից էլ հարկ վճարեն։
Եվ որքա՞ն է կարելի տուն տանել այդ միջին աշխատավարձից, ու ինչ կարելի է դրանով գնել։
2018 թվականի առաջին եռամսյակում միջին աշխատավարձը կազմել է 169,6 հազար դրամ։ Դրանից 40 հազար դրամ հարկ են պահում։ Կուտակային պահումները (եթե ծնվել եք 1974 թվականին ու դրանից ուշ) կազմում են 8 հազար։ Մնում է 120-130 հազար դրամ։
Վիճակագրական ծառայության տվյալներով՝ նույն առաջին եռամսյակի ընթացքում մթերային զամբյուղը կազմել է 35 հազար դրամ։ Սպառողական զամբյուղը (հագուստ, կոմունալ վճարումներ և այլն)՝ մոտ 61։ Ստացվում է՝ միջին աշխատավարձով կարելի է մի կերպ երկու հոգի պահել։
Սակայն ինչպես նշեցինք, միջին աշխատավարձ ստանում են ոչ բոլոր տաքսիստներն ու մատուցողները։ Իսկ եթե նրանց էլ հաշվե՞նք։ Այդ դեպքում ընտանիքում քանի՞ մարդ կկերակրենք միջին աշխատավարձով։