ԵՐԵՎԱՆ, 25 ապրիլի – Sputnik. ՀՅԴ–ն հայտարարեց, որ դադարեցնում է ՀՀԿ–ի հետ կազմած կոալիցիայի մասնակցությունը։ Այս մասին նշված է ՀՅԴ գերագույն մարմնի տարածած հայտարարության մեջ։
«Հաշվի առնելով առկա իրավիճակը՝ հայտարարում ենք քաղաքական կոալիցիային մեր մասնակցության դադարեցման մասին»,– հայտարարում է ՀՅԴ–ն։
ՀՅԴ–ն ընդգծում է լիարժեք ժողովրդավարական պայմանների ապահովմամբ արտահերթ խորհրդարանական ընտրություններ անցկացնելու անհրաժեշտությունը։ Իսկ մինչ այդ ՀՅԴ–ն կարևորում է ժողովրդի վստահությունը վայելող վարչապետի ընտրությունը, ներքաղաքական լարվածության լիցքաթափումը, քաղաքական ճգնաժամի հաղթահարումը։
Նշենք, որ ՀՅԴ–ն ու ՀՀԿ–ն կոալիցիա կազմավորելու մասին հուշագիրը ստորագրել էին 2017թ–ի խորհրդարանական ընտրություններից հետո, մայիսի 11-ին։ Հուշագիրը պետք է գործեր մինչև 6-րդ գումարման Ազգային ժողովի լիազորությունների ավարտը:
Քաղաքական վերոնշյալ երկու ուժերը կոալիցիոն հուշագրով քաղաքական պատասխանատվություն էին ստանձնել կառավարության ողջ գործունեության համար: Ստորագրված փաստաթղթում ամրագրված էին քաղաքական կոալիցիայի շրջանակներում համագործակցության ռազմավարական նպատակները, կոալիցիայի առաջնահերթությունները, գործունեության և կազմակերպման կարգը: Հայաստանի Հանրապետական կուսակցության կողմից փաստաթուղթը ստորագրել էր ՀՀԿ նախագահի տեղակալ Արմեն Աշոտյանը, Հայ Յեղափոխական Դաշնակցություն կուսակցության կողմից՝ ՀՅԴ Գերագույն մարմնի ներկայացուցիչ Աղվան Վարդանյանը:
Հիշեցնենք, որ ապրիլի 24-ի երեկոյան չեղյալ հայտարարվեց վարչապետի պաշտոնակատար Կարեն Կարապետյանի և «Ելք» դաշինքնի առաջնորդ Նիկոլ Փաշինյանի հանդիպումը, որի ընթացքում պետք է քննարկվեին հետագա անելիքները։ Կարեն Կարապետյանի խոսքով`Փաշինյանի վերջնագիրը նշանակում է, որ ոչ թե երկխոսություն պիտի կայանա, այլ Փաշինյանը ուզում է բացառապես հնչեցնել սեփական տեսակետը` ընդհուպ դիմացի կողմի բանակցողներին որոշելով։
Երևանում 10 օր տևած բողոքի ակցիաներից հետո ապրիլի 23-ին ՀՀ վարչապետ Սերժ Սարգսյանը հրաժարական տվեց։ Օրեր շարունակ տասնյակ հազարավոր մարդիկ ցույցերի էին դուրս եկել` բողոքելով Սերժ Սարգսյանի իշխանության երկարացման դեմ (2008 թվականից նա ղեկավարում էր երկիրը որպես նախագահ, իսկ ապրիլի 17-ին խորհրդարանն ընտրել էր նրան որպես վարչապետ ու պետության փաստացի ղեկավար)։
ՀՀ վարչապետ Սերժ Սարգսյանի հրաժարականից հետո ՀՀ նախագահ Արմեն Սարգսյանն ընդունեց նաև կառավարության հրաժարականը։ Այս պահին կառավարության ղեկավարի պարտականություններն իրականացնում է Կարեն Կարապետյանը։ Նախարարները շարունակում են աշխատել ժամանակավոր պաշտոնակատարների կարգավիճակով։