ԵՐԵՎԱՆ, 23 ապրիլի — Sputnik. Ապրիլի 25-ին, ժամը 11։00-ին Նիկոլ Փաշինյանը «Մարիոթ Արմենիա» հյուրանոց է հրավիրում վարչապետի պաշտոնակատար Կարեն Կարապետյանին։ Այս մասին նա հայտարարեց այսօր Հանրապետության հրապարակում, որտեղ անցկացվում է «Իմ քայլը» նախաձեռնության հանրահավաքը։
Ընդ որում, Նիկոլ Փաշինյանը կոչ արեց իշխանություններին ժողովրդի թավշյա հեղափոխության հաղթանակը ճանաչել անվերապահորեն ու առանց նախապայմանների։
«Ես հույս ունեմ, որ վերնախավը կճանաչի թավշյա ոչ բռնի հեղափոխության հաղթանակը»,- ասաց նա։
Ինչ վերաբերում է հետագա անելիքներին, Փաշինյանը հայտնեց, որ առաջիկա 1 շաբաթվա ընթացքում ԱԺ-ն վարչապետ է նշանակելու ժողովրդի թեկնածուին, ձևավորվելու է ժամանակավոր կառավարություն, որից հետո հնարավոր ամենասեղմ ժամկետներում նշանակվելու են արտահերթ խորհրդարանական ընտրություններ։
«Հայաստանում երկար տարիներ հաստատված է եղել ատելության, վենդետային մթնոլորտ։։ Ես ուզում եմ իրար հետ արձանագրենք, որ այդ էջը Հայաստանում փակված է»,- հայտարարեց նա։
Փաշինյանը կոչ արեց բոլոր նրանց, ովքեր արդեն ճամպրուկներն են հավաքում ու մտածում Հայաստանից փախչելու մասին, չանել դա, որովհետև Հայաստանում, նրա խոսքով` վենդետա չի լինելու, ատելություն, վրեժխնդրություն չի լինելու։