ԵՐԵՎԱՆ, 22 ապրիլի — Sputnik. ՀՅԴ Հայաստանի գերագույն մարմինը հայտարարություն է տարածել` նշելով, որ վարչապետի պաշտոնից Սերժ Սարգսյանի հրաժարականից հետո անհրաժեշտ է երկխոսությամբ, համախոհությամբ ձևավորել այնպիսի քաղաքական օրակարգ, որը կընդգրկի երկրում անհրաժեշտ արագ բարեփոխումների ժամանակացույցն ու ճանապարհային քարտեզը։
«ՀՀ Վարչապետ Սերժ Սարգսյանի ժամանակին տրված հրաժարականը, ձերբակալված երեք պատգամավորների ազատ արձակումը Հայաստանի զարգացման նոր փուլ սկզբնավորելու նախադրյալներ են ստեղծում։ Այդ փուլի ճիշտ մեկնարկի համար անհրաժեշտ է երկխոսությամբ, համախոհությամբ ձևավորել այնպիսի քաղաքական օրակարգ, որը կընդգրկի երկրում անհրաժեշտ արագ բարեփոխումների ժամանակացույցն ու ճանապարհային քարտեզը»,- ասված է հայտարարության մեջ։
Հայ Յեղափոխական Դաշնակցությունը շարունակելու իր ջանքերը այդ երկխոսության ու համախոհության ձևավորման համար։
Սկսված գործընթացի հաջողության հիմնական գրավականը ՀՅԴ-ն համարում է մեր քաղաքացիների, հատկապես երիտասարդ սերնդի ակտիվությունը։ Ըստ նրանց` շատ կարևոր է ապահովել հաջորդ հանգրվանի հաջողությունը։
«Պետք է շարունակել ժողովրդային շարժման բացառապես խաղաղ բնույթը` զուգահեռաբար հաշվի առնելով երկրում բնականոն կյանքի հաստատման անհրաժեշտությունը։ Ժողովրդային շարժումը պետք է շարունակի թույլ չտալ որևէ արտաքին միջամտություն մեր ներքին կյանքին և պայմաններ ապահովի առկա խնդիրները քաղաքական դաշտում լուծելու համար»,- ասված է հայտարարությունում։
Հայ Յեղափոխական Դաշնակցությունը հորդորում է Հայոց ցեղասպանության նահատակների հիշատակի օրվա նախօրեին համաժողովրդային ձեռքբերումը վերածել համազգային համախոհության, մեր Հայրենիքի թռիչքային զարգացման նոր ու հուժկու ազդակի։