ԵՐԵՎԱՆ, 20 ապրիլի — Sputnik. ՀՀ ԱԳ նախարար Էդվարդ Նալբանդյանը «Առավոտ» թերթին տված հարցազրույցում, մեկնաբանելով վերջին օրերին արտերկրում Հայաստանի դիվանագիտական ներկայացուցչությունների առջև կազմակերպվող բողոքի ակցիաները, նշել է, որ նրանք ունեն իրենց Հայրենիքում տեղի ունեցող իրադարձությունների մասին կարծիք հայտնելու իրավունք։
«Այնուամենայնիվ, չեմ կարծում, որ Հայաստանի դիվանագիտական ներկայացուցչություններ ներխուժելը, դրանց աշխատանքը խոչընդոտելը, սեփական հայրենիքի ներկայացուցչությունները վարկաբեկելու փորձերը և դրանք առցանց ցուցադրելը կարելի է համարել հայրենասիրության դրսևորում»,- ասել է Նալբանդյանը` համոզմունք հայտնելով, որ կարծիք արտահայտելու քաղաքակիրթ ձևեր կան։
Դիտարկմանը, թե բողոքի ակցիաները հայտնվել են միջազգային մամուլի ուշադրության կենտրոնում, նախարարը պատասխանել է, որ միջազգային կառույցներն ու մեր գործընկեր երկրները շատ լավ տեղեկացված են Հայաստանում տեղի ունեցող գործընթացներից, քանի որ Հայաստանում ժողովրդավարության ամրապնդման բարեփոխումներն իրականացվել են նրանց հետ համագործակցությամբ:
«Այն, ինչ այս ուղղությամբ իրագործվել է հատկապես վերջին տասնամյակում, կասկածի տեղ չի թողնում, որ Հայաստանում հիմնարար ազատությունների պաշտպանության ոլորտում արձանագրված առաջընթացը կայուն և անդառնալի է»։
Ըստ Նալբանդյանի` մեր երկրում ազատորեն իրականացվող երթերն ու ցույցերը անհնար կլիներ պատկերացնել առանց վերջին տարիների ժողովրդավարության ուղղությամբ հետևողական ու շարունակական բարեփոխումները կյանքի կոչելու։ Այդուհանդերձ անգամ այդ երկրները գիտեն, որ ազատությունների դրսևորման համար որոշակի սահմաններ կան։
«Գուցե այդքան էլ ճիշտ չէ զուգահեռներ անցկացնել, այնուամենայնիվ, որո՞նք են այն երկրները, ուր կարող է հանդուրժելի համարվել տևական ժամանակով քաղաքացիների ազատ տեղաշարժի խոչընդոտումը, կրթօջախներ, պետական հիմնարկներ և այլ հաստատություններ ներխուժելու փորձերը, նրանց բնականոն աշխատանքի խաթարումը, հանրային ու մասնավոր գույքի վնասումը, հասարակական կարգի խախտումը և այլն»,- ասել է ԱԳ նախարարը: