ԵՐԵՎԱՆ, 19 ապրիլի — Sputnik. Հայտնի հաղորդավար Իվան Ուրգանտն իր քառասունամյակի առթիվ «Երեկոյան Ուրգանտ» հաղորդմանը հրավիրել է շոումեն Գարիկ Մարտիրոսյանին, քանի որ «ծննդյան տոնին պետք է իսկական ընկերները գան»։
Ուրգանտը խոստովանել է` Գարիկը համոզել է իրեն չնշել 40–ամյակը, քանի որ դա վատ նախանշան է։ Հաղորդավարի հարցին` արդյո՞ք Մարտիրոսյանը կհյուրընկալի հաղորդմանը այդ օրը, նա կատակել է. «Կարող ես նույնիսկ չասել, իհարկե, կգամ, չէ որ 40–ամյակը չեն նշում»։
Հումորիստները կատակներ են փոխանակել եթերում` հոբելյանների, մոտեցող «ծերության» թեմայով ու հանդիսատեսի ծափահարությունները գնահատել որպես իրենց տարիքի նկատմամբ «հարգանքի նշան»։
Չսպասելով նվերին` Իվանն առաջինը Գարիկին ճապոնական դանակ է հանձնել ու խորհուրդ տվել դրա միջոցով «հայկական» ուտեստ պատրաստել, օրինակ` ռոլեր խաղողի թփով։
Սակայն Գարիկը «տակը չի մնացել», նույնպես նվեր է մատուցել Իվանին։ Եվ Ուրգանտի «բողոքին», թե 40–ամյակին նվերներ չեն անում, Մարտիրոսյանն արդարացել է, թե պահել էր նվերը նախորդ տարվանից։
«Հիշու՞մ ես, 39–ամյակիդ ես մի քիչ շուտ գնացի, որովհետև նվեր չէի բերել», – հարցրեց Գարիկը։
«Այո, ես նկատել էի։ Ամեն մեկն իր համար վճարեց, իսկ դու` ոչ», – միանգամից պատասխանեց Իվանը։
Մարտիրոսյանն Ուրգանտին հայ վարպետների պատրաստած սուրճի բաժակներ ու մի տուփ «իսկական հայկական» սուրճ նվիրեց` ասելով, որ պետք չէ հարցնել` արդյո՞ք Հայաստանում սուրճ աճում է։
«Հայաստանում ամեն ինչ աճում է, հատկապես` արտաքին պարտքը», – կատակեց Մարտիրոսյանը։
Նա վստահեցրեց հաղորդավարին, որ Երևանում ամենահամեղ սուրճն են պատրաստում։