ԵՐԵՎԱՆ, 19 ապրիլի — Sputnik. Ապրիլի 19-ին Գյումրիում երիտասարդները կրկին օրը սկսեցին քայլերթով` Թատերական հրապարակից շարժվելով դեպի Գյումրու քաղաքապետարան, որտեղ տեղի էր ունենալու ավագանու հերթական նիստը:
Երթի մասնակիցները փորձեցին մտնել քաղաքապետարան, սակայն կառույցի մուտքը հսկող ոստիկանները արգելեցին:
Ավելի ուշ ցուցարարները եղան տարբեր ուսումնական հաստատություններում` փորձելով հորդորել տվյալ հաստատությունների տնօրեններին ազատ թողնել ուսանողներին ու աշակերտներին ու չխոչընդոտել վերջիններիս երթին միանալու ցանկությունը: Որոշ տնօրեններ փաստեցին՝ ծնողների հետ կա պայմանավորվածություն չթողնել երեխաներին, և եթե, իրոք, պատանիները ցանկանում են մասնակցել բողոքի երթին, ապա կարող են միանալ դասերից հետո:
Գյումրու Թատերական հրապարակում ապրիլի 19–ին, ժամը 18։00-ին կրկին նախատեսվում է հավաք անցկացնել: