ԵՐԵՎԱՆ, 18 ապրիլի — Sputnik. Հայտնի հոլիվուդյան պրոդյուսեր Ստեփան Մարտիրոսյանին կհանձնեն Հայաստանի իրավապահ մարմիններին։ Այս մասին հաղորդում է ՌԻԱ Նովոստին` հղում անելով Մարտիրոսյանի փաստաբան Դմիտրի Ռոշչինին։
Պրոդյուսերը 2017թ-ի հոկտեմբերի 27-ից գտնվել է Մոսկվայի №4 քննչական մեկուսարանում։ Հայաստանում նրա նկատմամբ հարուցվել է խարդախության մասին գործ։
Մարտիրոսյանին ձերբակալել են հենց ինքնաթիռից իջնելիս Մոսկվայի օդանավակայանում։
Չորեքշաբթի Մոսկվայի քաղաքային դատարանն օրինական է ճանաչել Ռուսաստանի գլխավոր դատախազության որոշումը Մարտիրոսյանին հայ իրավապահների հանձնելու մասին։
«Նրան կալանավորելու պատճառը Հայաստանի Հանրապետության հարցումն է իբր խարդախության փաստով քրեական պատասխանատվության ենթարկելու մասին», — մեջբերում է Ռոշչինի խոսքերը ՌԻԱ Նովոստին։
20 տարի առաջ Մարտիրոսյանը տեղափոխվել է Հոլիվուդ, որտեղ հաջողությամբ պրոդյուսերի կարիերա է սկսել։
Պրոդյուսերի փաստաբանը հայտարարում է, որ Մարտիրոսյանի դեմ առաջադրած մեղադրանքները մտացածին են, քանի որ «այն վերաբերում է կինոպրոդյուսերի գործունեությանը 2011-2013թթ-ին` ԱՄՆ-ում ֆիլմեր ստեղծելուն, այլ ոչ թե Հայաստանում»։
Փաստաբանը կարծում է, որ Մարտիրոսյանի ձերբակալությունը սադրանք է` նախաձեռնված ԱՄՆ-ի հատուկ ծառայությունների կողմից և նպատակ ունի ձախողել նրա ֆիլմի նկարահանումները, քանի որ նա դրական լույսի ներքո է ներկայացնում Ռուսաստանի նախագահ Պուտինին։
Նրա փաստաբանը հայտարարել է, որ 2017թ-ի հոկտեմբերին պրոդյուսերը ժամանել է Ռուսաստան, որպեսզի համաձայնեցնի ֆիլմի արտադրությունը։
ՌԴ Գերագույն դատարանում կկայանա դատական նիստ, որի ընթացքում վերջնականապես կլուծվի Ստեփան Մարտիրոսյանին Հայաստանի իրավապահ մարմիններին հանձնելու մասին հարցը։
20 տարի առաջ Մարտիրոսյանը տեղափոխվել է Հոլիվուդ, որտեղ պրոդյուսերի կարիերա է սկսել։ Նա մասնակցել է «Նոյեմբերի մարդը», «Փրկվածը», «Ֆրիլանսերներ», «Փախուստի ծրագիր» և այլ ֆիլմերի ստեղծագործական աշխատանքներին։