ԵՐԵՎԱՆ, 17 ապրիլի — Sputnik, Անի Լիպարիտյան. Երևանում քաղաքացիական անհնազանդության ակցիաները զայրացրել են մայրաքաղաքի շատ բնակիչներին` զգալի անհարմարություններ պատճառելով և խախտելով կյանքի սովորական ռիթմը։
Կենսաթոշակառու Իրինա Մեդնիկովան երկրորդ օրն է արդեն ստիպված է երկու ժամ ծախսել խանութ գնալու համար։ Այդ մասին Իրինան պատմեց Sputnik Արմենիայի հետ զրույցում։
Կինը խոստովանեց, որ շատ հեռու է քաղաքականությունից, որպեսզի պրոֆեսիոնալ կերպով մեկնաբանի իրավիճակը երկրում, բայց վստահ է, որ Հայաստանում բոլորը կայունության կարիք ունեն։
«Դատելով այդ երկու լարված օրերից` չեն կարողանում ապահովել մեր հանգստությունը։ Իսկ երբ երկրում նման իրավիճակ է, ապա դու քնել չես կարող», – ասաց կենսաթոշակառուն։
Տիկին Իրինային խանգարում է քաղաքի փակ ճանապարհները։ Նա ապրում է Բաղրամյան փողոցի վրա և ի վիճակի չէ մեկուկես ժամ քայլել մինչև մոտակա սուպերմարկետը։
«Չեմ կարող հացի գնալ։ Պետք է շրջանցել ոստիկանական շարասյունը` խանութ հասնելու համար։ Ես ստիպված էի բարձրանալ Ամերիկյան համալսարան տանող աստիճաններով, իսկ այդտեղից էլ գնալ ուրիշ խանութ», – նշեց Sputnik Արմենիայի զրուցակիցը` հավելելով, որ նրա տարիքում երկար քայլելը և աստիճաններով բարձրանալը շատ բարդ է։
Մեր զրուցակցի գնահատականով` քաղաքում իրավիճակը լարված է, բոլորը նյարդայնանում են, հատկապես, երբ տեսնում են ոստիկաններին սաղավարտներով։
«Հաճելի տեսարան չէ։ Բայց ամենագլխավորը, որ ոչ ոք չի կոպտում», – ասաց տիկին Իրինան։
Երևանի բնակչուհին հավելեց նաև, որ այս օրերին նրա ծանոթները որոշել են երեխաներին չուղարկել դպրոց և մանկապարտեզ` տրանսպորտի հետ կապված բարդությունների պատճառով ու անվտանգության նկատառումներով։
Sputnik Արմենիայի մեկ այլ զրուցակից` տաքսիստ Էդգար Մուրադյանը, նշեց, որ մայրաքաղաքի կաթվածահար եղած փողոցներն անհարմարություններ են պատճառում թե՛ ուղևորներին, թե՛ վարորդներին։
«Իմ փորձը և ճանապարհներն իմանալն օգնում է շրջանցել փակ փողոցները։ Դրանք փակ են տարբեր կողմերից։ Մարդիկ ոչ միայն մեքենա վարել, այլ անգամ զբոսնել չեն կարող», – նշեց վարորդը։
Նախօրեին նա ստիպված է եղել մի քանի անգամ ավտոմեքենան թողնել մայրաքաղաքի տարբեր մասերում և ոտքով հասնել անհրաժեշտ տեղը։
«Ուղևորները սարսափած են. շատերը շտապում են աշխատանքի կամ էլի ինչ-որ տեղ, իսկ երիտասարդությունը կանգնեցնում է տրանսպորտը և փակում ճանապարհները», – հավելեց Էդգարը։
Երիտասարդությունն այսօր և նախօրեին փակել էր փողոցները, կանգնեցրել վարորդներին` կոչ անելով միանալ բողոքի ակցիային, սակայն մեր զրուցակիցը դա չի արել, քանի որ նման ակցիաներն անիմաստ է համարում։ Ավելի լավ է կողքից նայել, վստահ է Էդգարը։
Նշենք, որ ցուցարարները փակել են մայրաքաղաքի հիմնական տրանսպորտային ուղիները։ Թեև հասարակական տրանսպորտը Երևանում փորձում է հետևել սահմանված ժամանակացույցին, սակայն փակ փողոցների պատճառով վարորդները ստիպված են ընտրել շրջանցող ճանապարհներ։
Հիշեցնենք, որ Երևանում և Հայաստանի այլ քաղաքներում բողոքի ակցիաներ են ընթանում ընդդեմ Սերժ Սարգսյանի վարչապետության։