Խորհրդարանի նիստի ժամանակ այսօր ընդդիմադիր «Ելք» խմբակցության պատգամավոր Արարատ Միրզոյանը, ելույթի համար հերթագրվելով ու ամբիոնին մոտենալով, քննարկվող հարցի փոխարեն հայտարարություն արեց։
«ՀՀ ազատ քաղաքացիներ, եկել է պահը, երբ մենք կարող ենք կանխել Սերժ Սարգսյանի երրորդ ժամկետով իշխանավարումը, վերջ տալ ՀՀԿ իշխանությանն ու կերտել մեր երազանքների Հայաստանը։ Դրա համար անհրաժեշտ է ապրիլի 13-ին, ժամը 18:30 գալ Ազատության հրապարակ, որտեղ մենք միասին կվառենք մեր ազատության ջահը»,- ասաց նա։
Հետո Միրզոյանը գրպանից հանեց ու վառեց ծխացող ճայթուկը, որից դեղին ծուխ բարձրացավ։
Նույն պահին նրան մոտեցավ նաև նույն խմբակցության անդամ Լենա Նազարյանն ու այրեց մեկ այլ ճայթուկ, որը սկսեց կանաչ ծուխ արձակել։