ԵՐԵՎԱՆ, 8 ապրիլի — Sputnik. Պաշտպանության նախարարությունը հիվանդություների նոր ցանկը նախագծի տեսքով տեղադրել է իրավական ակտերի հրապարակման միասնական կայքում` նախնական ծանոթության համար:
Նախագծով հստակեցվում են քաղաքացիների առողջական վիճակը բնորոշող հիվանդությունները, դրանց հետևանքով քաղաքացիների տարկետումների կամ ծառայությունից ազատվելու հնարավորությունները։
Ձևակերպումները համապատասխանեցված են «Զինվորական ծառայության և զինծառայողի կարգավիճակի մասին» օրենքի պահանջներին և սահմանում են այն առողջական խնդիրները, որոնց առկայության դեպքում քաղաքացիներին հակացուցված են զինվորական ծառայության պայմանները:
Ըստ նախագծի` զինվորական ծառայության, ինչպես նաև ռազմական ուսումնական հաստատություններ դիմելու համար ոչ պիտանի են ծանր կամ չափավոր աստիճանի մտավոր հետամնացություն, խիստ արտահայտված հոգեկան խանգարումներ, աֆեկտիվ փսիխոզ, սուր և անցողիկ փսիխոտիկ խանգարումներ, նևրոտիկ, սթրեսով պայմանավորված և սոմատոֆորմ խանգարումներ, գլխուղեղի և ողնուղեղի անոթային հիվանդություններ, կենտրոնական նյարդային համակարգի բնածին արատներ, քրոնիկ վարակիչ հիվանդություններ, արյան համակարգի և մի շարք այլ հիվանդություններ ունեցող քաղաքացիները:
Ամբողջական ցանկին կարող եք ծանոթանալ այստեղ: