ԵՐԵՎԱՆ, 5 ապրիլի — Sputnik. Սուրբ Աթոռում Հայաստանի Հանրապետության արտակարգ և լիազոր դեսպան Միքայել Մինասյանը Vatican News-ին տված հարցազրույցում խոսել է այսօր Վատիկանի այգիներում տեղադրվելիք Տիեզերական եկեղեցու վարդապետ, էկումենիզմի խորհրդանիշ Սուրբ Գրիգոր Նարեկացու բրոնզաձույլ արձանի օծման արարողության մասին։
Նրա խոսքով` Նարեկացու արձանի տեղադրումը մտերմության նշան է։
«Վատիկանի պարտեզներում Սուրբ Գրիգոր Նարեկացու արձանի տեղադրումը խորհրդանիշ է՝ երկու իրականությունների, երկու եկեղեցիների միջև եղբայրության, բոլոր քրիստոնյաների, մասնավորապես՝ Մերձավոր Արևելքի քրիստոնյաների եղբայրության»,- ասել է Միքայել Մինասյանը։
Նարեկացու բրոզաձույլ արձանի հեղինակը հայտնի քանդակագործ Դավիթ Երևանցին է։ Ձուլվել է արձանի երկու օրինակ`մեկը՝ Վատիկանի պարտեզների, իսկ մյուսը՝ Էջմիածնի վեհարանի պարտեզների համար։
«Արվեստն այսպիսով դառնում է եղբայրության ուղերձ, որ կարող է միավորել քույր եկեղեցիներին»,- նշում է Vatican News-ը:
«Մենք, նախ և առաջ հիշում ենք Ֆրանցիսկոս պապի ճանապարհորդությունը՝ որպես ուխտագնացություն։ Բազմաթիվ ուխտագնացներ Ֆրանցիսկոս պապից օրինակ են վերցրել և սկսել են ուխտագնացություններ կատարել քրիստոնյա, մշակույթով հարուստ, արևելյան, բայց միևնույն ժամանակ նույնքան արևմտյան այդ երկիր։
Վատիկանի պարտեզներում արձանի տեղադրման այս գաղափարը քննարկվել է ՀՀ նախագահ Սերժ Սարգսյանի և Նորին Սրբություն Ֆրանցիսկոս պապի միջև, երբ Նախագահը Սուրբ Հորը նվիրեց այդ արձանի փոքր օրինակը՝ որպես երախտագիտության նշան Սուրբ Գրիգոր Նարեկացուն Տիեզերական եկեղեցու վարդապետի տիտղոսը շնորհելու համար»,- պատմել է Միքայել Մինասյանը։
Նշենք, որ օծման արարողությանը, ի թիվս այլ բարձրաստիճան հյուրերի, կմասնակցի նաև ՀՀ նախագահ Սերժ Սարգսյանը և Նորին Սրբություն Ֆրանցիսկոս պապը։