ԵՐԵՎԱՆ, 4 ապրիլի — Sputnik. Գարեգին Բ Ամենայն Հայոց Կաթողիկոսն այսօր՝ ապրիլի 4-ին, Հռոմի Կաթոլիկ Եկեղեցու Քահանայապետ Ֆրանցիսկոս պապի հրավերով մեկնում է Վատիկան, ուր ապրիլի 5-ին կմասնակցի Սուրբ Գրիգոր Նարեկացու արձանի բացման արարողությանը: Այս մասին հայտնում են Մայր Աթոռի տեղեկատվական համակարգից։
Տիեզերական եկեղեցու վարդապետ Գրիգոր Նարեկացու 2 մետրանոց բրոնզե արձանը կանգնեցվել է Վատիկանում։
Հիշեցնենք, որ 2016 թվականի հունիսին Հռոմի պապ Ֆրանցիսկոսի հայաստանյան այցի շրջանակում նախագահ Սերժ Սարգսյանը Սրբազան Քահանայապետին նվիրեց Գրիգոր Նարեկացու արձանի մանրակերտը՝ որպես Պապի` առաջին քրիստոնյա երկիր ուխտագնացության խորհրդանիշ: Արձանը Սրբազան Քահանայապետին նվիրելիս նախագահ Սարգսյանը հույս հայտնեց, որ դրա մեծ տարբերակն ապագայում կտեղադրվի Վատիկանում: Պապը հավանեց արձանն ու շնորհակալություն հայտնեց նախագահին՝ տալով իր համաձայնությունը:
Կարճ ժամանակ անց ստեղծագործական թիմը՝ Հայաստանի ժողովրդական նկարիչ, Նարեկացու արձանի հեղինակ Դավիթ Երևանցու գլխավորությամբ գործի անցավ: Ճարտարապետ Միքայել Հասրաթյանը և ծրագրի ղեկավար Վարդան Կարապետյանն ակտիվորեն ներգրավվեցին արձանի ստեղծման աշխատանքներում, իսկ Արթուր Ջանիբեկյանը, ով, ի դեպ, աշխարհում Նարեկի տարածման իսկական նվիրյալ է, միացավ ինձ` դառնալով արձանի երկրորդ բարերարը:
Գրիգոր Նարեկացին հայ միջնադարյան հոգևորական է, քրիստոնյա աստվածաբան, միստիկ բանաստեղծ, երաժիշտ և փիլիսոփա։ Նա սրբադասվել է Հայ առաքելական եկեղեցու կողմից։ Գրիգոր Նարեկացու ստեղծագործություններից հատկապես հայտնի է և մեծ ժողովրդականություն է վայելում «Մատյան ողբերգության» («Նարեկ») չափածո աղոթքների ժողովածուն։ Հռոմի Ֆրանցիսկոս պապը Գրիգոր Նարեկացուն դասել է Կաթոլիկ Եկեղեցու Տիեզերական վարդապետների շարքը։