ԵՐԵՎԱՆ, 2 ապրիլի — Sputnik. Հյուսիսային պողոտայի «Բուրգեր Քինգ» սննդի կետում տեղի ունեցած պայթյունից տուժածների վիճակը բավարար է:
8-ամյա Ռուբինա Մարկոսյանն այս պահին դեռ գտնվում է վիրահատարանում: 1,5 ժամ առաջ մեկնարկած վիրահատությունը մոտենում է ավարտին:Այս մասին լրագրողներին հայտնեց Գրիգոր Լուսավորիչ ԲԿ վերակենդանացման բաժանմունքի վարիչ Սամվել Կարապետյանը:
Ըստ նրա՝ մեծ պատռված վերքեր էին առաջացել աղզդրի շրջանում, սալջարդ: Ստացած վնասվածքների ապաքինումից հետո երեխայի մարմնի վրա անցանկալի հետևանքներ թողնելու մասին հարցին բժիշկն առայժմ դժվարացավ պատասխանել:
Ինչ վերաբերում է մնացած տուժողներին, նրանց՝ պայթյունից ստացած վիրավորումները, բժշկի հավաստմամբ, հետագա ազդեցություն չեն թողնի:
Բժշկի դիտարկմամբ, պայթյունից տուժածները վախեցած չեն, կան թեթև վնասվածքներ ստացածներ, որոնք ուզում են դուրս գրվել: Բայց բժիշկները նրանց դեռ շարունակում են պահել հսկողության տակ: