ԵՐԵՎԱՆ, 30 մարտի — Sputnik, Նելլի Դանիելյան. ՀՀ արդարադատության նախարարության Անձնական տվյալների պաշտպանության գործակալությունը ստուգման գործընթաց է նախաձեռնել` պարզելու, թե որքանով է «ՎիզաՄետրիկ» ՍՊԸ կողմից ՀՀ քաղաքացիների անձնական տվյալների մշակումը համապատասխանում ՀՀ օրենսդրությանը: Այս մասին տեղեկացնում է Արդարադատության նախարարության մամուլի ծառայությունը։
Բանն այն է, որ ապրիլի 3-ից Գերմանիա, Բելգիա, Նիդեռլանդներ, Լյուքսեմբուրգ, Ավստրիա և Շվեդիա մեկնելու համար շենգենյան վիզայի ստանալու դիմումները ՀՀ քաղաքացիները ներկայացնելու են ոչ թե Գերմանիայի դեսպանություն, ինչպես ներկայում, այլ առանձին սպասարկող ընկերություն՝ «ՎիզաՄետրիկ» ՍՊԸ։
Այս մասին մարտի 28-ին հայտարարել է ՀՀ-ում Գերմանիայի արտակարգ և լիազոր դեսպան Մաթիաս Քիսլերը։
Ու թեև դեսպանը հայտարարել էր, որ հայաստանյան գրասենյակը ղեկավարելու է հայ ներկայացուցիչը և աշխատակազմում բացառապես ՀՀ քաղաքացիներ են լինելու, բայց միաժամանակ նաև շեշտել էր` «Վիզամետրիկը» ռուս-թուրքական կոնսորցիում է, որի հոլդինգ կազմակերպությունը գտնվում է Թուրքիայում։
Դեսպանի այս հայտարարությունը, բնականաբար, Հայաստանում աննկատ չի մնացել։ Մտավախություն է առաջացել, որ ՀՀ քաղաքացիների անձնական տվյալները կարող են հայտնվել թուքական ծառայությունների ձեռքում։
«Ինձ համար տարօրինակ է, որ Գերմանիայի դեսպանատունը և Գերմանիայի արտակարգ ու լիազոր դեսպանն ինքն է հայտարարում, թե այդ կազմակերպությունն ում հսկողության տակ է»,– Sputnik Արմենիայի հետ զրույցում, անդրադառնալով խնդրին, ասաց «Ազգային անվտանգություն» կուսակցության նախագահ Գառնիկ Իսագուլյանը։
Թե ինչ նպատակով է դեսպանն այս հայտարարությունն արել, Իսագուլյանը դժվարացավ նշել, բայց շեշտեց, որ դա արվել է միանշանակ ոչ Հայաստանի շահերից ելնելով։
«Ինչու են մեզ ուզում ներքաշել այս խնդրի մեջ, ես ուղղակի չեմ հասկանում,– ասաց նա,–այսօրվա աշխարհաքաղաքական գործընթացներն այնպիսին են, որ դժվար է հասկանալ` տվյալ պետությունն այդ խնդիրներում իր շահից ելնելով է այդ գործողությունն անում, թե թելադրանքով է անում»։
Գառնիկ Իսագուլյանի համար այս պահին անհասկանալի է, թե ինչ շագանակներ է փորձում Գերմանիայի դեսպանը Հայաստանի միջոցով հանել կրակից։
Ինչ վերաբերում է անձնական տվյալների անվտանգությանը, մինչ պետական մարմինների կողմնորոշվելը, Գառնիկ Իսագուլյանը ՀՀ շարքային քաղաքացիներին խորհուրդ է տալիս ինքնուրույն որոշել` դիմե՞լ շենգենյան վիզա ստանալու համար և տրամադրե՞լ անձնական տվյալները, թե՞ զգուշանալ ու առայժմ ձեռնպահ մնալ շենգենյան երկրներ այցելությունից։
Մինչ ՀՀ իշխանություններն ու փորձագետները փորձում են հասկանալ, թե ինչ է թաքնված շենգենյան վիզաների տրամադրման նոր կարգի հետևում, Sputnik Արմենիան փորձել է պարզել, թե ինչ կազմակերպություն է «ՎիզաՄետրիկը» և որ երկրների հետ է այն փոխկապակցված։
Համաձայն ընկերության պաշտոնական կայքում հրապարակված տվյալների (iraq.visametric.com/en/content/about.html)%60" http://iraq.visametric.com/en/content/about.html)` VisaMetric ընկերությունը ստեղծվել է 2013թ–ին, iDATA Danişmanlik A.Ş. (iDATA) և VMS ընկերությունների կողմից` իրենց ծառայությունների որակն ու աշխարհագրությունն ընդլայնելու նպատակով։
Ընդ որում, iDATA–ն թուքական ընկերություն է (https://www.idata.com.tr/ita/en), VMS–ը` ռուսական (http://italy-vms.ru/)։
Ռուսական VMS ընկերությունը Ռուսաստանում գործում է 2008թ ապրիլից, գրանցված է որպես «Виза менеджмент сервис» ՓԲԸ և զբաղվում է բացառապես Իտալիա մուտքի վիզաների ձևակերպմամբ։ Ընկերության կայքում հրապարակված տվյալների համաձայն` VMS-ը Իտալիայի վիզային կենտրոնի միակ հավատարմագրված ընկերությունն է։
Իսկ ՀՀ պետռեգիստրի տվյալներով` հայաստանյան մասնաճյուղը` «Վիզամետրիկ» ՍՊԸ–ն, գրանցվել է 2018թ փետրվարի 28-ին։ Որպես հիմնադիր նշված է «Վիզամեթրիք Վիզե Հիզմեթլերի վե Դանըշմանլիք դըշ Թիճարեթ Անոնիմ Շիրքեթի», որն, ի դեպ, նույն թուրքական IDATA ընկերությունն է։
Հետաքրքրական է, որ հայաստանյան ու թուրքական ընկերությունների ինտերնետային կայքերը նույնությամբ կրկնում են միմյանց նաև կառուցվածքով` https://www.idata.com.tr/ita/en և https://www.visametric.com/Armenia/Sweden/hy ։
«ՎիզաՄետրիկ» միջազգային կազմակերպությունը պաշտոնական կայքում (https://www.visametric.com/) հրապարակված տվյալների համաձայն, ներկայացուցչություններ ունի 7 երկրում։ Դրանք են` Հայաստանը, Ադրբեջանը, Թուրքիան, Ռուսաստանը, Ղազախստանը, Չինաստանը, Իրաքը։