ԵՐԵՎԱՆ, 28 մարտի — Sputnik, Անի Լիպարիտյան. Facebook սոցցանցն արգելափակում է օգտատերերին այս կամ այն ազգությանն ուղղված ժարգոնային բառերի համար։ Օրինակ` հայ օգտատերերից շատերի էջերն արգելափակվել են «ազեր» («ադրբեջանցի» բառի կրճատ տարբերակ) բառն օգտագործելու համար։
Որպես օրինակ մի թարմ դեպք ներկայացնենք, որը մի քանի ժամ առաջ տեղի ունեցավ հայտնի մեդիափորձագետ Սամվել Մարտիրոսյանի հետ։ Նա այսօր ասուլիս էր հրավիրել, որի ընթացքում անդրադարձել էր համացանցային հանրության համար արդիական թեմաներին։ Միջոցառումից անմիջապես հետո նրա Facebook-յան էջն արգելափակվեց։
Զավեշտալին այն է, որ Մարտիրոսյանին արգելափակել էին ժամանակին կատակով գրված գրառման մեջ (անեկդոտ ուկրաինացիների մասին) «խոխոլ» բառն օգտագործելու համար։
«Խնդիրն այն է, որ ֆիդբեք չկա։ Չկա տեղ, ուր կարող ես դիմել, որևէ մեկը չկա, ում կարող ես գրել։ Եթե ձեր էջն արգելափակել են կոնկրետ ժամանակով, ապա պետք է պարզապես սպասել», — Sputnik Արմենիայի թղթակցի հետ զրույցում իրավիճակը մեկնաբանեց Մարտիրոսյանը։
Նա ավելացրեց, որ «վիրավորական մականուններ» օգտագործող օգտատերերի նկատմամբ պատժամիջոցներ սկսեցին կիրառել ռուս-ուկրաինական հարաբերությունների սրումից հետո, երբ ռուսներն ու ուկրաինացիները զանգվածաբար սկսեցին իրար վրա ցեխ շպրտել սոցցանցում:
Մարտիրոսյանը մեկնաբանեց նաև Facebook-ի news feed-ի հետ կապված իրավիճակը։ Ինչպես և խոստացել էր սոցցանցի ստեղծող Մարկ Ցուկերբերգը, սոցցանցը նվազեցրել է նորությունների նշանակությունը, իսկ հայկական մեդիայի մոտ 90%-ը կախված է հենց այդ կայքից։
Հայտնի է, որ Facebook-ում փոքր-ինչ խնդիր առաջանալու դեպքում հայկական առցանց լրատվամիջոցներից շատերի տրաֆիկը նվազում է, իսկ շատ դեպքերում նաև զրոյանում, մամուլի ասուլիսի ժամանակ ասաց Մարտիրոսյանը։
«Այս խնդիրն ամբողջ աշխարհում կա, սակայն Հայաստանում ավելի շատ է, որովհետև մեզ մոտ մեդիադաշտի մեծ մասը նստած է «Ֆեյսբուքի ասեղի» վրա: Մյուս երկրներում դա դիվերսիֆիկացված է, տրաֆիկը գալիս է մի քանի սոցիալական ցանցերից, սակայն Հայաստանում այդպես չէ: Հետևաբար ամեն տատանում իր ազդեցությունն է թողնում: Բավական է` մի քանի ժամ «Ֆեյսբուքը» չաշխատի, լրատվամիջոցների մոտ խուճապ է առաջանում», — ասաց Մարտիրոսյանը:
Իհարկե, ԶԼՄ-ներից շատերի ներկայացուցիչները քննադատեցին Facebook-ի հեղինակին և այդ գաղափարի նախաձեռնողներին, բայց փաստն այն է, որ այսօր նորությունների բաժնում նորություններ գրեթե չկան։
Այս որոշումն ակնհայտորեն խոցել է ԶԼՄ-ներին, որոնք առավել հաճախ դիտումներ էին ապահովում հենց այդ սոցցանցի միջոցով։
«Facebook-ի ադմինիստրացիան այս որոշումն ընդունել էր որոշ հոգեբանական ուսումնասիրություններ անցկացնելուց հետո։ Մոտ հազար մարդ մասնակցել են փորձին. մի մասը միայն լրատվական կայքերն է դիտել, մյուսները միայն ընկերների հետ է շփվել։ Պարզվել է, որ առաջիններն առավել հաճախ են դեպրեսիայի մեջ ընկել», — պարզաբանեց փորձագետը։
Նրա խոսքով` նորամուծությունից հետո հայկական մեդիադաշտը լսարանի 20-25% կորուստ է ունեցել: