ԵՐԵՎԱՆ, 27 մարտի — Sputnik, Անի Լիպարիտյան. Հայկական ՏՏ շուկայում առաջիկայում հետաքրքիր մշակում կհայտնվի. ծրագրավորողները որոշել են ստեղծել մի հավելված, որը կարող է ակնթարթորեն գտնել անհրաժեշտ դեղամիջոցը։
Նոր ծրագրի միջոցով հնարավոր կլինի պարզել, թե անհրաժեշտ դեղը քաղաքի որ դեղատանը կա։
Հասանելի բուժում` հայ ծրագրավորողների օգնությամբ
Հավելվածը կոչվում է FastMed։ Ծրագրի մշակող Գրիգոր Կորկոտյանը մանրամասն պատմել է, թե ինչպես է ծնվել հավելվածը։
«Մոտավորապես մեկուկես տարի առաջ բժիշկը 7 ամսական դստերս համար դեղ նշանակեց։ Մենք սկսեցինք փնտրել դեղատներում և ավելի քան 10 դեղատուն այցելելուց հետո չկարողացանք գտնել։ Շատ բարկացա, այդ մասին պատմեցի ընկերներիս ու ծանոթներիս ու պարզեցի, որ նրանցից շատերը բախվել են այդ խնդրին»,- ասաց Գրիգորը։
Այդ ժամանակ հասկացավ, որ դեղ գտնելու մի քանի տարբերակ կա` հերթով մտնել դեղատներ, զանգել վճարովի տեղեկատու, փորձել դեղ գտնել վատ ինտերֆեյսով կայքում կամ կոնկրետ դեղատների հավելվածներում (որոնք ցույց են տալիս միայն այն, ինչ այդ պահին կա վաճառքում)։
Գրիգորը որոշեց թիմ հավաքել ու անվճար հավելված մշակել, որն արագ ու հարմար կլինի օգտագործման համար և դրա միջոցով հնարավոր կլինի անհրաժեշտ դեղամիջոցը գտնել մոտակա դեղատներում։
«Հավելվածը շուտով հասանելի կլինի Հայաստանի և Արցախի բնակիչների համար։ Կաշխատի Android և iOS համակարգերով։ Հիմա թեստային տարբերակն է հասանելի, բայց մինչև ամառ արդեն հնարավոր կլինի ներբեռնել պաշտոնական տարբերակը»,- Sputnik Արմենիային ասաց նա։
Այս պահին հավելվածով հնարավոր է կոնկրետ դեղատանը նախապես «ամրագրել» անհրաժեշտ դեղորայքը, հետո ավելի ուշ գնալ ու վերցնել դեղատնից։ Ավելի ուշ հավելվածը թույլ կտա դեղը գնել նաև առցանց ռեժիմում` տուն առաքելու տարբերակով։ Նույն այդ հավելվածով հնարավոր կլինի ուղիղ կապի միջոցով շփվել դեղագործի հետ։
Հիմա ծրագրավորողները մտածում են դեղերը դեղատոմսերով վաճառելու նոր կարգի մասին։ Նրանք ուզում են, որ FastMed-ով հնարավոր լինի գնել նաև բժշկի նշանակած դեղերը։
Իշխանությունն ուզում է օգնել սթարթափներին
Տրանսպորտի, կապի և տեղեկատվական տեխնոլոգիաների փոխնախարար Ամալյա Եղոյանը վստահ է, որ Հայաստանում լավ սթարթափներ շատ կան, որոնց պետք է առաջ մղել։ Այս մասին այսօր նա ասաց լրագրողներին` նշելով, որ թարմ նախագծերի մեծ մասը աջակցության կարիք ունեն։
«Արտագաղթը կնվազի միայն այն դեպքում, երբ Հայաստանը դառնա բիզնես-երկիր, ներգրավի տարբեր ընկերությունների և նոր աշխատատեղեր ստեղծի»,- ասաց նա։
Եղոյանի խոսքով` 2017 թ-ին Հայաստանում 29,6% աճ է գրանցվել ՏՏ ոլորտում, նախորդ տարում երկրում բացվել են 351 ընկերություն, ստեղծվել են 15 հազար աշխատատեղ, որոնցից 2000-ը մինչև հիմա թափուր են։
«Մեզ համար շատ կարևոր է, որ ՏՏ ոլորտը զարգանա նաև Երևանից դուրս։ 27 ձեռնարկություն արդեն ստեղծվել են Գյումրիում, մարզերում նույնպես ներուժ կա»,- ասաց նա։
Եղոյանի խոսքով` Հայաստանն արդեն դուրս է եկել միջազգային շուկա, և մեզ ճանաչում են ստեղծված ու հաջողված հավելվածներով, որոնցից են SoloLearn-ը, PicsArt-ը, Shadowmatic-ը, Volterman-ը և այլն։