Ռուսաստանի նախագահ Վալդիմիր Պուտինը Կեմերովոյում խորհրդակցության ժամանակ հայտարարել է, որ ողբերգությունը հանցագործ անփութության, անբարեխղճության հետևանք է եղել։
«Ի՞նչ է մեզ մոտ կատարվում, չէ՞ որ սրանք մարտական գործողություններ չեն, հանքահորում մեթանի պատահական արտանետում չէ։ Մարդիկ հանգստանալու էին եկել, երեխաներ կային։ Մենք խոսում ենք ժողովրդագրության մասին և այդքան մարդ կորցնում ի՞նչ պատճառով։ Հանցագործ անփութության, անբարեխղճության», — ասել է Պուտինը։
Նա նաև ցավակցություն է հայտնել զոհվածների հարազատներին ու բարեկամներին` մեկ րոպե լռությամբ սկսելով խորհրդակցությունը։
Պուտինը Քննչական կոմիտեի ղեկավար Ալեքսանդր Բաստիրկինին հանձնարարել է իրավական գնահատական տալ ողբերգությունը չկանխած պաշտոնատար անձանց գործողություններին։
«Առանց գումարի տեղեկանք ստանալ չի կարելի, իսկ գումարով հնարավոր ամեն ինչ կստորագրեն», — ասել է նախագահը։
Ռուսաստանի առաջնորդն անդրադարձել է նաև ողբերգության հուզական կողմին. «Զոհերի քանակի մասին խոսելիս առաջին զգացողությունը… ոչ թե լացել, այլ ոռնալ ես ուզում», — ասել է ռուս առաջնորդը։
ՌԴ ԱԻՆ վերջին տվյալների համաձայն` ողբերգության հետևանքով մահացել է 64 մարդ։ Հրդեհը բռնկել է Կեմերովոյի «Զիմնյայա վիշնյա» քառահարկ առևտրի կենտրոնում մարտի 25-ին, պատճառները դեռ պարզվում են։
Հիմնական վարկածները երկուսն են. կա՛մ երեխաներն են այրել խաղասենյակի պորոլոնը, կա՛մ հրդեհի պատճառ են դարձել մանկական տոնի ժամանակ վառած մոմերը։
Կրակը տարածվել է ավելի քան 1500 քմ մակերես ունեցող տարածքում։ Հակահրդեհային համակարգը չի աշխատել, մարդկանց չեն տարհանել։
Ռուսաստանում 100 տարվա ընթացքում գրանցված հրդեհների ցանկում այս ողբերգությունն ամենախոշորներից մեկն է զոհերի քանակով։ Խոշոր հրդեհներ են եղել Սամարայի Ներքին գործերի վարչությունում (1999 թվական, 57 զոհ), Կրասնոդարի երկրամասի Կամիշևատսկայա ավանի ծերանոցում (2007 թվական, 63 զոհ) և Պերմի «Խրոմայա լոշադ» ակումբում (2009 թվական, 153 զոհ)։