ԵՐԵՎԱՆ, 26 մարտի — Sputnik. Ֆրանսիայի Հանրապետության նախագահ Էմանուել Մակրոնը շնորհավորական ուղերձ է հղել Հայաստանի Հանրապետության նորընտիր նախագահ Արմեն Սարգսյանին` նախագահ ընտրվելու առիթով:
Ուղերձում Ֆրանսիայի նախագահը նշել է, որ ուրախ կլինի աշխատել Արմեն Սարգսյանի հետ պատմական վաղեմի կապերի վրա հիմնված երկկողմ հարաբերությունների ամրապնդման ուղղությամբ:
«Վերջերս Եվրոպայի Միության հետ ստորագրված համապարփակ և ընդլայնված գործընկերության համաձայնագիրը, որի բանակցություններին իր գործուն մասնակցությունը ցուցաբերեց Ֆրանսիան, նոր դինամիկա է հաղորդում, որը, հուսով եմ, կարտահայտվի մեր երկու երկրների միջև ներդրումների և առևտրատնտեսական հարաբերությունների վերելքով»,- նշել է Մակրոնը:
Նա հիշատակել է այս տարվա հոկտեմբերի 11-12-ը Երևանում կայանալիք Ֆրանկոֆոնիայի գագաթնաժողովը` նշելով, որ այն Ֆրանսիայի և Հայաստանի միջև կապերը խորացնելու, հատկապես Հայաստանում ֆրանսիական համալսարանը և ֆրանսիական դպրոցը զարգացնելու, ինչպես նաև մշակութային ցուցափեղկ դառնալու կոչում ունեցող Շառլ Ազնավուրի կենտրոնի միջոցով Հայաստանում ֆրանսերեն լեզուն ամրապնդելու եզակի հնարավորություն:
Վերջում Ֆրանսիայի նախագահը հավաստիացրել է, որ Ֆրանսիան, որպես ԵԱՀԿ Մինսկի խմբի համանախագահ, լիովին հանձնառու է Լեռնային Ղարաբաղի հակամարտության կարգավորման բանակցված և կայուն լուծում գտնելու գործընթացին:
Արմեն Սարգսյանին շնորհավորել են նաեւ Մարոկկոյի թագավոր Մոհամադ Վեցերորդը, Վիետնամի Սոցիալիստական Հանրապետության նախագահ Չան Դայ Կուանը, Կուբայի պետական խորհրդի նախագահ, Նախարարների խորհրդի նախագահ Ռաուլ Կաստրո Ռուսը, Թունիսի Նախագահ Էլ Բեջի Կաիդ Էլ Սեբսիը, Սլովակիայի Հանրապետության Ազգային խորհրդի նախագահ Անդրեյ Դանկոն: