ԵՐԵՎԱՆ, 25 մարտի — Sputnik. Կեղծ «Կոկա կոլա»-ներ ու «Ֆանտա»-ներ այս պահին հայաստանյան վաճառակետերում չկան։ Այս մասին Sputnik Արմենիային հայտնեցին ՀՀ ԳՆ Սննդի անվտանգության պետական ծառայությունից` անդրադառնալով լրատվամիջոցների հրապարակած տեղեկություններին, թե 3000-ից ավելի շշալցված կեղծ ըմպելիքներ են հայտնաբերվել իրացման կետերում։
Սննդամթերքի անվտանգության պետական ծառայության մամուլի քարտուղար Նվարդ Առաքելյանը հայտնեց, որ լրատվամիջոցներում ներկայացված տեղեկությունն իրականություն է, իրոք, շուկայում գազավորված կեղծ ըմպելիքներ են հայտնաբերվել։ Սակայն դա 2 ամսվա վաղեմության դեպք է։
Կեղծ ըմպելիքների հերթական խմբաքանակը հայտնաբերվել էր ս.թ. հունվարին, որից հետո այն ամբողջությամբ հավաքվել է շուկայից:
«Դրանց վաճառքը կասեցվել է, տեղեկատվությունը փոխանցվել ոստիկանություն»,- ասաց Առաքելյանը։
Ոստիկանությունից Sputnik Արմենիային հայտնեցին, որ «Կոկա կոլա», «Ֆանտա նարնջի համով» և «Ֆանտա էկզոտիկ» կեղծ ապրանքային նշաններով գազավորված ըմպելիքների արտադրության և դրանց վաճառքի արդյունքում պատճառված վնասը պարզելու համար քննություն է կատարվում։
Ի դեպ, նշենք, որ պատկան կառույցների ուսումնասիրությունները ցույց են տվել, որ շշերի վրա փակցված դրոշմապիտակները կեղծ են, դրանց շնորհիվ է հնարավոր եղել պարզել, որ ըմպելիքները կեղծված են։ Ավելի ուշ լաբորատոր ստուգումներն ապացուցել են, որ կեղծված է նաև շշի մեջ լցված հեղուկների բաղադրությունը։ Թե իրականում ինչ է եղել դրանց մեջ` առայժմ չի հրապարակվում։