ԵՐԵՎԱՆ, 23 մարտի — Sputnik. Կնոջ և դստեր սպանության համար մեղադրված, բայց արդեն ազատության մեջ գտնվող Խորեն Ղազարյանը «Իրականում» թոք-շոուի ժամանակ հայտարարել է, որ գիտի` ով է սպանել իր ընտանիքին։ Նա կարծում է, որ սպանության հեղինակը կնոջ եղբայրն է` Սերգեյ Կարագուլյանը։
Կինը` Վիկտորյա Ղազարյանը, և նրա 9 տարեկան դուստրը` Նինան, սպանվել են Մոսկվայի կենտրոնում գտնվող իրենց բնակարանում։ Հանցագործը դանակի ավելի քան 40 հարված է հասցրել նրանց։
Քննության տվյալով`բնակարանից ոչինչ չի կորել, իսկ դուռը փակ է եղել ներսից։ Տեսախցիկներն արձանագրել են, որ առավոտյան ժամը չորսին, երբ ենթադրաբար կատարվել է սպանությունը, տուն է վերադարձել Խորեն Ղազարյանը։ Նա մուտք է դուրս եկել կես ժամ անց։ Նրան ձերբակալել են, բայց տղամարդը վստահեցրել է, որ ինքն այդ ամբողջ ընթացքում փորձել է զանգել կնոջը և տուն մտնել։
Քննության ընթացքում ԴՆԹ փորձաքննություն է իրականացվել և պարզվել, որ փոքրիկը Ղազարյանի հարազատ դուստրը չէ։ Կասկածել են, որ Խորենն իմացել է կնոջ դավաճանության մասին և հաշվեհարդար տեսել։
Խորթ երեխա
Խորենն «Իրականում» հաղորդման ժամանակ խոստովանեց` փորձաքննությունից 12 ամիս անց է իմացել, որ աղջկա հայրն ինքը չէ։
«Ես միշտ առավոտյան 3-4-ին էի տուն վերադառնում… Այդ օրը ես երկար ժամանակ կանգնել էի դռան առաջ ու զանգում էի, որ դուռը բացեն։ Մտածեցի` կինս քնել է ու գնացի ավտոմեքենայիս մոտ։ Առավոտյան զանգեցի կնոջս ընկերուհիներին, պարզվեց, որ կինս նրանց զանգերին էլ չի պատասխանում։ Հարևաններս խորհուրդ տվեցին դուռը կոտրել, բայց դա դժվար կլիներ»,- պատմեց Խորենը։
Նա խնդրել է բակի հավաքարարին օգնել, որ բնակարան մտնի տանիքից (բնակարանը 22-րդ հարկում է)։ Դրանից հետո հայտնաբերել է կնոջ ու դստեր դիակները։
«Հանցագործը մեր տուն է մտել ոչ այնքան հեշտ ճանապարհով`ցածրիկ եզրապատով։ Մոլագարն այդ ճանապարհով չէր անցնի։ Հատուկ պատրաստված մարդ է եղել։ Կնոջս հարազատները զբաղվում են պարաշյուտային սպորտով, նրանց համար դա բարդ չէր լինի»,- ասաց հաղորդման հերոսը։
Թոք-շոուի հաղորդավար Դմիտրի Շեպելևի հարցին` Խորենն ակնարկում է, որ կնոջ եղբա՞յրն է սպանել, տղամարդը պատասխանեց` այո։
Նրա կարծիքով` սպանողը պրոֆեսիոնալ է եղել, ոչ պատահական մարդ։ Իսկ ինչ վերաբերում է Վիկտորյայի եղբորը, Խորենի կարծիքով, նա միշտ հիմար է ձևանում, բայց խարդախի մեկն է։
Մրցավազք գույքի համար
Խորենը վստահեցրեց, որ սպանողը հաստատ ուզել է տիրանալ գույքին։
«Նա հստակ եկել էր սպանելու իմ աղջկան` իմ փոքրիկ երջանկությանը, որովհետև նա էր իմ միակ ժառանգը։ Եկել էին մեր գույքի հետևից, բնակարանն ավելի քան 200 քառակուսի մետր է… Գույքը ձևակերպել եմ աղջկաս անունով»,- պատմեց նա։
Սպանության օրը Խորենը զանգել է կնոջ հորը` Կարլ Կարագուլյանին, որը բավականին ուշ է եկել դեպքի վայր։ Նա նույնպես ներկա էր «Իրականում» հաղորդմանը և հայտարարեց, որ փեսան 100 տոկոսով իմացել է` ով է սպանել կնոջը։ Նա վստահեցրեց, որ սպանության պատճառը խանդն է եղել։
«Երևի գիտեր, որ երեխան իրենից չէ։ Կարող է նաև, որ ինքը սպանած չլինի, այլ նրան վատություն անելու համար սպանած լինեն։ Սպանողը կարող է լինել մեկը, ում պարտք է եղել նա»,- ասաց Կարագուլյանը։
Խորենը շարունակեց պնդել, որ սպանել է կնոջ եղբայրը։
«Այդ մարդը Սերգեյ Կարագուլյանն է։ Բոլորը հարցնում են` իսկ հարազատ եղբայրը կարո՞ղ է սպանություն պատվիրել։ Ես պատասխանում եմ` իսկ հարազատ հայրը կարո՞ղ է 40 հարված հասցնել իր դստերը։ Բայց կնոջս եղբայրն ալիբի ունի, նա անձամբ չի սպանել, այլ պատվիրել է»,- նշեց տղամարդը։
Ղազարյանը հիշեցրեց նաև, որ իր 4 բնակարանները 2016 թվականի ապրիլին վաճառել է աները` Կարլ Կարագուլյանը։ Խորենի ամբողջ գույքը դստեր մահից հետո անցել է Կարագուլյանների ընտանիքին, ավելի հստակ` աներոջը։ Բանտից դուրս գալուց հետո Խորենը զրկվել է ամեն ինչից։ Հաղորդման վերջում ստի դետեկտորը հաստատեց, որ Խորեն Ղազարյանը չի սպանել դստերն ու կնոջը։