ԵՐԵՎԱՆ, 22 մարտի — Sputnik. Երեք տարի հետո Երևանը երիտասարդական նոր ավան կունենա։ Երևանի քաղաքապետարանի ներկայացրած քաղաքաշինական ծրագիրն այսօր արժանացել է ՀՀ կառավարության հավանությանը։
Ծրագիրը քաղաքապետարան է ներկայացրել «Երևանի պետական համալսարանի շրջանավարտների միավորում» հասարակական կազմակերպությունը, որն իրականացնում է բնակարանային ապահովության սոցիալական ծրագրեր: Երիտասարդական նոր թաղամասը կառուցվելու է Երևանի Իսակովի պողոտան Լենինգրադյան փողոցին կապող Մոնթե Մելքոնյանի անունով ճանապարհին հարակից տարածքում։ Այս տարածում 6,57 հա մակերեսով հողամասն այսօր շինարարության նպատակով տրամադրվեց «Երևանի պետական համալսարանի շրջանավարտների միավորում» կազմակերպությանը։
Նոր ավանը կունենա մոտ 1000 բնակարան, կանաչապատ հանգստի գոտիներ, մանկապարտեզ, կենցաղ-սպասարկման և հասարակական նշանակության տարածքներ։ Ծրագրի ներդրումային ընդհանուր արժեքը կկազմի շուրջ 52 մլրդ ՀՀ դրամ և առաջիկա 3 տարիների ընթացքում կապահովի շուրջ 2400 աշխատատեղ։ Ծրագրի մեկնարկը նախատեսվում է 2018թ․ ապրիլի 1-ից, ավարտը՝ 2021թ․ հուլիսի 1-ին։
Երևանում կառուցվում են բազմաբնակարան բնակելի համալիրներ, որոնք շուկայականից ցածր գներով ու վարկային ցածր տոկոսադրույքներով տրամադրվում են բնակարանի կարիք ունեցող երիտասարդ մասնագետներին:Կառավարության հաստատած նախագծի հիմնավորման մեջ ասվում է, որ մատչելի պայմաններով բնակարան ձեռք բերելու պահանջարկը բավական մեծ է։ Առկա ծրագրերին մասնակցելու շուրջ 1200 դիմում է ստացվել, ինչը նոր ծրագրի առիթ է դարձել։