ԵՐԵՎԱՆ, 21 մարտի — Sputnik. Հայաստան եկող ռուսական գազը երբեք նորմայից պակաս ջերմություն չի տվել, չորեքշաբթի խորհրդարանական լսումների ժամանակ ասաց ՀՀ էներգետիկ ենթակառուցվածքների և բնական պաշարների նախարար Աշոտ Մանուկյանը։
Պետական ստանդարտի համաձայն` գազի ջերմատվությունը 1 խմ-ի դիմաց 7 900 կկալ է, իսկ Հայաստանը երբեք 8 100-ից ցածր գազ չի ստացել։
Միևնույն ժամանակ Հայաստանը նորմայից բարձր կալորիականության համար լրացուցիչ չի վճարում` պահպանելով 1000 խմ-ի դիմաց 150 դոլար վճարը։
«Իհարկե, յուրաքանչյուրն ինքն է ընտրում, թե ինչ վառելիք օգտագործի։ Սակագնի հարցերը նույնպես ոչ ոք չեղյալ չի հայտարարել։ Սակայն գազի որակի վերաբերյալ հարցեր լինել չեն կարող», — հայտնեց նախարարը։
Ավելի վաղ մի շարք ՀԿ-ներ հայտնել էին, որ այն գազը, որ ստանում են ՀՀ սպառողները, գրեթե չի տաքացնում։ Նրանք նշել էին, որ գազին ազոտ են խառնում։ Էներգետիկայի նախարարության ներկայացուցիչներն առարկում են. դա ձեռնտու չէր լինի զուտ տնտեսական առումով։