ԵՐԵՎԱՆ, մարտի 20 — Sputnik. «Ծխախոտային արտադրատեսակների օգտագործման բացասական ազդեցության նվազեցման և կանխարգելման մասին» օրենքի նախագիծը խմբագրման փուլում է, առաջարկներն ամփոփվել են, այժմ քննարկումներ են ընթանում, այսօր հրավիրված ասուլիսի ժամանակ լրագրողներին ասաց ՀՀ առողջապահության նախարարության հակածխախոտային պայքարի ազգային ծրագրի ղեկավար Ալեքսանդր Բազարչյանը։
Նախագիծը ներկայացնելուց հետո շատ է խոսվում, որ նախատեսված տուգանքների չափը չի համապատասխանում ՀՀ քաղաքացու գրպանին:
«Ինչքանով են դրանք իրատեսական կամ, ինչպես ասում են, մատից ծծած, դեռ պետք է գնահատենք», — լրագրողների հետ զրույցում ասաց Բազարչյանը։
Ասուլիսի մյուս մասնակիցներն էլ պատմեցին, թե սիգարետների տուփերի սարսափազդու պատկերներն ինչ դեր են ունենում ծխախոտի դեմ պայքարում։
«Վրացական երազանք» իշխող կուսակցության ղեկավար Ակակի Զոիձեն ընդգծեց, որ սարսափելի պատկերները հետ են պահում երեխաներին ծխելուց։
«16-ից 21 տարեկանում ծխել չսկսած երեք մարդկանցից մեկը զարգացած երկրներում պատկերները նայելուց հետո միացել է ծխելու դեմ պայքարին», —ասաց Զոիձեն` կատակելով, որ մի կողմից պաստառները օգնում են փրկել մարդկանց ծխելուց, մյուս կողմից էլ` հնարավորություն են տալիս ծխողներին կողքից «վայելել» իրենց օրգանիզմում կատարվող փոփոխությունները։
Ավելի վաղ Sputnik Արմենիան գրել էր, որ հանրապետության ծխողների 51,5%-ը տղամարդիկ են, 1.8%-ը` կանայք։ 2018 թվականի հունվարին Առողջապահության նախարարությունը ծխելու դեմ օրինագիծ էր պատրաստել։
Օրինագծով արգելվում են ծխախոտի վաճառքն ու ծխելը հիվանդանոցներում, մանկապարտեզներից, դպրոցներից և բուհերից մինչև 100 մետր հեռավորությամբ գտնվող տարածքներում։ Չի կարելի ծխել նաև մարզադաշտերի մոտակայքում (հատկապես`ներսում)։ Վերջապես, արգելվում է ծխել ռեստորաններում, ճաշարաններում, գինետներում ու սրճարաններում։
«Ծխախոտային արտադրատեսակների օգտագործման բացասական ազդեցության նվազեցման և կանխարգելման մասին» օրենքի նախագիծը Հայաստանում խոշոր տուգանքներ է նախատեսում հասարակական վայրերում ծխելու համար։
Արգելվում է սիգարետի վաճառքը, ծխելը հիվանդանոցների, պոլիկլինիկաների, սրճարանների, ռեստորանների տարածքներում, վերելակում և այլն, ինչպես նաև մանկապարտեզներից, դպրոցներից և բուհերից 100 մետր հեռավորության վրա։ Նշված վայրերում սիգարետ վաճառելու համար նախատեսվում է 500 հազար դրամ տուգանք, իսկ ծխելու համար` 200 հազար դրամ։