ԵՐԵՎԱՆ, 16 մարտի — Sputnik. Հայ-թուրքական արձանագրություններն ավելի շատ պետք են եղել Հայաստանին, քան Թուրքիային, ադրբեջանական ԱՊԱ գործակալությանը հայտարարել է Թուրքիայի ԱԳ փոխնախարար Ահմեդ Յըլդըզը։
Նա խոստովանել է, որ Երևանի կողմից արձանագրությունների չեղարկումը «տհաճ է եղել ընտրությունների նախաշեմին»։ Այնուամենայնիվ, ըստ նրա, արձանագրություններն ավելի շատ ձեռնտու էին Հայաստանին, քան Թուրքիային։
«Նրանց գործն է։ Ամեն դեպքում այս տարիների ընթացքում նրանք չեն կարգավորել ղարաբաղյան հակամարտությունը։ Այդպիսով նրանք ևս մեկ անգամ ցույց են տալիս իրենց դիրքորոշումը։ Մենք առաջին հերթին ցանկանում ենք, որպեսզի Հայաստանը զորքերը դուրս բերի ադրբեջանական հողերից։ Դա կլիներ հակամարտության լուծման բանալին։ Նրանք չցանկացան», – ասել է Յըլդըզը։
ԱԳՆ երկու երկրների ղեկավարները դիվանագիտական հարաբերություններ հաստատելու և երկկողմանի հարաբերությունների զարգացման վերաբերյալ արձանագրությունները ստորագրել էին 2009թ-ի հոկտեմբերի։ Մինչև այդ Հայաստանի նախագահ Սերժ Սարգսյանը և Թուրքիայի նախագահ Աբդուլլահ Գյուլը փոխադարձ այցեր էին կատարել` ներկա լինելով Հայաստան-Թուրքիա ֆուտբոլային հանդիպումներին։
Ֆուտբոլային դիվանագիտությունը» ենթադրում էր առանց նախապայմանների հարաբերությունների հաստատում։ Այլ խոսքով` ենթադրվում էր, որ Հայաստանը Թուրքիայից չի պահանջի ճանաչել Հայոց ցեղասպանությունը, իսկ Թուրքիան զիջումներ չի պահանջի արցախյան հարցում։ Հայաստանը կատարել է իր պարտականությունները, Թուրքիան հրաժարվել է վավերացումից` հայտարարելով «հայկական ուժերը բռնազավթված տարածքներից դուրս բերելու» անհրաժեշտության մասին։
Հայաստանի իշխանությունները մի քանի տարի շարունակ չէին փակում բանակցությունների դռները։ Սակայն 2018 թվականի մարտի 1-ին Սերժ Սարգսյանը արձանագրությունները չեղարկելու վերաբերյալ հրամանագիր ստորագրեց։
Պաշտոնական Երևանի որոշման մասին ոչ միայն Թուրքիան է տեղեկացվել, այլև այն երկրները, որոնց ներկայացուցիչները Ցյուրիխում ներկա էին արձանագրությունների ստորագրմանը` Ռուսաստանը, ԱՄՆ-ն, Ֆրանսիան, Շվեյցարիան և ԵՄ-ն։