ԵՐԵՎԱՆ, 16 մարտի — Sputnik. Ստամբուլում բացվել է Անիի թագավորության ճարտարապետական ժառանգությանը նվիրված ցուցահանդես։ Այդ մասին հաղորդում է Ստամբուլի հայերի «Ակոս» թերթը։
Այցելուները ցուցանմուշներին կարող են ծանոթանալ մարտի 14–ից ապրիլի 29–ը։
Ստամբուլի «Տեպո» մշակութային կենտրոնում բացվել է «Քարերի պոեզիան` Անի. ճարտարապետական գանձարան մշակույթների խաչմերուկում» խորագիրը կրող ցուցահանդեսը, որտեղ ներկայացված են լուսանկարներ և տեսահոլովակներ` նվիրված Անի քաղաքին, որի ավերակները ներառված են ՅՈՒՆԵՍԿՕ–ի համաշխարհային ժառանգության ցուցակում։
«Լուսանկարների հեղինակներն են Արա Գյուլերը, Մուրադ Գերմենը, Մարտին Մանուկյանը և Վեդաթ Աքչագյոզին», –ասվում է հաղորդագրությունում։
Բացի այդ, Ստամբուլում տեղի է ունեցել «Անի. համաշխարհային մշակույթի ժառանգությունը Թուրքիայում» համաժողովը, որին մասնակցել են նորվեգացի մասնագետներ Քարսթեն Պալուտան–Մյուլերը, Արմեն Ղազարյանը, ճարտարապետ Յավուզ Օզկանյանը և լուսանկարիչ Վեդաթ Աքչագյոզը։
Նրանք ներկայացրել են զեկույցներ Անի քաղաքի մշակութային պատմության մասին։
Նշենք, որ «Հազար ու մի եկեղեցիների» քաղաքի մասին առաջին հիշատակումները վերաբերում են հինգերորդ դարին։ 961-1045 թվականները Անին Բագրատունիների թագավորության մայրաքաղաքն է եղել, սակայն 1064 թվականին թուրք ասպատակները թալանել են այն։ Երբ քաղաքն իր հզորության և ծաղկունքի գագաթնակետին էր, այն ավելի քան մեկ միլիոն բնակիչ ուներ։