ԵՐԵՎԱՆ, 14 մարտի — Sputnik. Արտասահմանյան դպրոցներում սովորող ՀՀ քաղաքացիներին մինչ ուսման ավարտը չեն զորակոչի բանակ։ Հայ դպրոցականներին հնարավորություն կընձեռնվի արտերկրում ուսումն ավարտել, որից հետո նրանք պետք է ծառայություն անցնեն ՀՀ զինված ուժերում:
«Զինվորական ծառայության և զինծառայողի կարգավիճակի մասին» օրենքի համապատասխան փոփոխությունների նախագիծը քննարկել է ԱԺ պաշտպանության և անվտանգության մշտական հանձնաժողովի նիստում։
Օրինագծի փոփոխված տարբերակն առաջարկում է զորակոչը հետաձգել Հայաստանի ներսում սովորող դպրոցականների ու մասնագիտական ուսումնարաններում սովորողների համար։
Նախագիծը ներկայացրել է պատգամավոր ու խոշոր գործարար Միհրան Պողոսյանը, որը նաև ՀՀ նախկին գլխավոր հարկադիր կատարողն է։
Նրա խոսքով, առաջարկվում է ավելացնել «կամ օտար երկրներում» բառերը «Հայաստանի Հանրապետությունում» բառերից հետո:
«Զինվորական ծառայության եւ զինծառայողի կարգավիճակի մասին» օրենքում բացթողում կա: Մասնավորապես, օտար երկրներում կրթված երեխաների հարցը չի դիտարկվում»,- ասաց Պողոսյանը:
Նշենք, որ Հայաստանը ԵԱՏՄ միակ երկիրն է, որն անցել է 12-ամյա կրթության։ Այսինքն` տղաներից շատերի զորակոչային տարիքը լրանում է դպրոցն ավարտելուց առաջ։