ԵՐԵՎԱՆ, 13 մարտի — Sputnik. Իրանցի գործարար, Հայաստանում «Սաթիլիմ» ընկերության հիմնադրի երևանյան գրասենյակը երկու անգամ կողոպտել են։ Այս մասին հայտնում է shamshyan.com-ը։
«Գողացել են համակարգիչներ, հեռուստացույց և խոշոր չափի գումար: Սեփականատերերը թե՛ առաջին գողության, թե՛ երկրորդի ժամանակ դիմել են ոստիկանություն, սակայն, ըստ նրանց, ոստիկանները, չգիտես ինչու, չեն ցանկանում բացահայտել գողությունը, այն դեպքում, երբ տարածքում կան բանկեր, տեսախցիկներ և այլն», — նշված է հրապարակման մեջ։
Ոստիկանության ԶԼՄ-ների հետ կապի, վերլուծության և լրատվության բաժնի պետ Էդգար Ջանոյանը Sputnik Արմենիայի թղթակցի հետ զրույցում մեկնաբանեց` ինչու ոստիկանությունը «չի ցանկանում» բացահայտել հանցագործությունը։
«Ոստիկանությունն իրականացրել է բոլոր այն գործառույթները, որոնք օրենքի սահմաններում պարտավոր է կատարել։ Տվյալ պահին գործը Քննչական կոմիտե է փոխանցվել», — պարզաբանեց Ջանոյանը։
Նա նաև նշեց, որ տվյալ պահին այդ գործով հետաքննություն է իրականացվում։