ԵՐԵՎԱՆ, 9 մարտի — Sputnik. Փհենչհանի արծաթե մեդալանակիր, աշխարհի երկակի չեմպիոն Եվգենյա Մեդվեդևա-Բաբասյանը համոզված է՝ ոտքերն ու կոնքերն ընդգծող նեղ լոսիններն առանց կիսաշրջազգեստի կամ երկար բլուզի հագնելը վատ ճաշակի վկայություն է: Այս մասին նա խոսել է Woman Journal համացանցային պարբերականին տված հարցազրույցի ժամանակ:
«Ես տվյալ սեզոնի նորաձևության հետևից չեմ ընկնում, ինձ դուր է գալիս իմ կերպարն ըստ իմ հայեցողության և ճաշակի ստեղծել: Ոտքերն ու կոնքերն ընդգծող նեղ լոսիններն առանց կիսաշրջազգեստի կամ երկար բլուզի հագնելը, կարծում եմ, ճաշակի բացակայության վկայություն է»,- ասել է գեղասահորդուհին:
Կիսաշրջազգեստի և ջինսե տաբատի միջև Եվգենյան երկրորդը կընտրի՝ համարելով, որ տաբատ հագնելն ավելի հարմարավետ է:
Ժենյան նախընտրում է ինքնուրույն ստեղծել սահադաշտում իր կերպարները՝ սանրվածքից սկսած մինչև դիմահարդարումը, թեև այդ կերպարը նա անպայման քննակում է մարզիչի հետ:
«Կարծում եմ՝ ես ավելի լավ գիտեմ, թե ելույթի ժամանակ ինչպիսի տեսք եմ ուզում ունենալ: Ինձ համար ամենակարևորը աչքերն ընդգծելն է: Ես նաև առանձնահատուկ ուշադրություն եմ հատկացնում մազերի խնամքին, ելույթի ժամանակ դրանք պետք է խնամված և գեղեցիկ լինեն»,- ասել է Մեդվեդևան:
Եվգենյային ամենից շատ դուր է գալիս «Սեյլոր Մուն» անիմեի համանուն հերոսուհու կերպարը:
Այսօր աղջիկն ամբողջովին տարված է սպորտով, իսկ ապագայում նախատեսում է որևէ երաժշտական գործիքով նվագել սովորել:
Այժմ նա պատրաստվում է Միլանում մարտի 19-25-ն անցկացվելիք գեղասահքի աշխարհի առաջնությանը: