ԵՐԵՎԱՆ, 5 մարտի — Sputnik. Պրոֆեսիոնալ բռնցքամարտիկ, չեմպիոնական մի շարք տիտղոսներ նվաճած Վախթանգ Դարչինյանը պրոմոութերական ընկերություն կբացի և հայ բռնցքամարտիկներին կօգնի դուրս գալ համաշխարհային հարթակ։ Այս մասին նա այսօր հայտարարեց Երևանում հրավիրված ասուլիսի ժամանակ։
«Հայաստանում մեծ ներուժ կա, բայց չկան համապատասխան պայմաններ: Նրանց սպարինգ մրցակիցներ են պետք, հատկապես մեքսիկացիներ»,- ասաց Դարչինյանը:
Բռնցքամարտիկի խոսքով` իր պրոմոութերական ընկերությունը հնարավորություն կտա սկսնակներին, ոչ թե արդեն պրոֆեսիոնալ մենամարտեր անցկացրած մարզիկներին:
«Մենք այստեղ չունենք պրոմոութերական կազմակերպություն, որը մեր մարզիկների համար ճանապարհ կբացի դեպի համաշխարհային պրոֆեսիոնալ ռինգ: Ես հայաստանցի բռնցքամարտիկներին կտամ այդ հնարավորությունը, որ իրենց ուժերը փորձեն, այստեղ մարզվեն, իսկ վերջին փուլն ԱՄՆ-ում պատրաստվեն»,- ասաց նա:
Դարչինյանն ուզում է իր հնարավորություններն ու անունն օգտագործել հայ բռնցքամարտիկներին օգնելու համար:
«Ես պակաս անուն չունեմ դրսում, հուսամ՝ այն կօգնի, որ և՛ լավ մենամարտեր կազմակերպենք, և՛ հեռուստաընկերություններին գրավենք։ Երբ իմանան, որ հեռարձակելու են Վիկ Դարչինյանի մարզիկին, կարծում եմ՝ սիրով կաշխատեն մեզ հետ: Ես հնարավորություն կստեղծեմ մեր մարզիկների համար, որ ավելի շատ սպարինգներ ունենան դրսի բռնցքամարտիկների հետ, լավ փորձ ձեռք բերեն»,- ընդգծեց նա։
Դարչինյանը դեռ 2007 թվականին ավարտել է մարզական կարիերան, բայց երբ իմացել է, որ Եվգենի Գրադովիչը ցանկանում է նրա հետ մենամարտել, համաձայնել է, քանի որ նա ունի գոտի և գործող աշխարհի չեմպիոնն է:
«Ես իմ մարզական կարիերայում 9 գոտի եմ նվաճել, և ցանկալի կլիներ, որ գոտիներիս քանակը հասցնեի 10-ի, հետո նոր հեռանայի ռինգից: Այս ընթացքում անցկացրել եմ մեկ մենամարտ, որը գոտու համար չէր: Ստացվեց շատ լավ մենամարտ: Այն ուղարկեցի Մոսկվա, նայեցին: Այդ ձայնագրությունը տեսնելուց հետո դեռ լռում են, մտածում են: Եթե համաձայնեն, սիրով կանցկացնեմ կյանքի վերջին մենամարտը: Իսկ եթե հրաժարվեն, այլևս մենամարտ չեմ ունենա»,- ասաց հանրահայտ բռնցքամարտիկը։
Վանաձորցի Վիկ Դարչինյանն իր կարիերայի ընթացքում 52 մենամարտ է անցկացրել պրոֆեսիոնալ ռինգում, որոնցից 43-ն ավարտվել է հայ մարզիկի հաղթանակով։ Նա IBF, WBA, WBC և IBO վարկածներով աշխարհի բազմակի չեմպիոն է, IBF, WBA և WBC վարկածներով ամենաթեթև քաշային կարգում աշխարհի բացարձակ չեմպիոն։