ԵՐԵՎԱՆ, 5 մարտի — Sputnik, Արմենուհի Մխոյան. Շիրակի մարզի ստոմատոլոգները բողոքում են կառավարության և առողջապահության նախարարության ներդրած էլեկտրոնային համակարգի դեմ: Բողոքին միացել են Շիրակի մարզի ավելի քան 70 ստոմատոլոգ:
Ըստ բողոքարարների` կառավարության 2017թ. օգոստոսի 24-ի որոշումը խնդրահարույց է և առաջացնում է ֆինանսական և այլ խնդիրներ: Այս որոշումն, ըստ մասնագետների, ընդունվել է հապճեպ, մինչ ընդունումը նախապես չի քննարկվել մասնագետների հետ:
«Ստոմատոլոգիական բուժծառայությունն ունի իր առանձնահատկությունները, որոնք հաշվի չեն առնվել, օրինակ՝ աշխատաժամանակի ոչ նորմավորված լինելու հանգամանքը»,- նշեց ստոմատոլոգ Էմիլ Ասլանյանը:
Ստոմատոլոգները համարում են, որ այս համակարգը լուրջ վտանգներ է պարունակում, և նրանք առաջնային ու գլխավոր վտանգ են համարում մարդու անձնական տվյալների հրապարակային դառնալու վտանգը:
Ցանկացած բժիշկ իր ID քարտով կարող է մտնել համակարգ և բժիշկների ու հաճախորդների մասին իմանալ ամեն ինչ, ինչը ցանկալի չէ ո՛չ հիվանդին, ո՛չ մասնագետին:
«Որոշման մեջ կան բազում թերություններ` սկսած ամենակարևորից. մարդու անձնական, առողջական տեղեկությունը վտանգված է անորոշ հատկանիշներով, և այդտեղ հնարավոր չէ կարգավորումներ տալ, թե մարդու մասին տեղեկությունն ինչպես պետք է գաղտնի մնա»,- ներկայացնելով բողոքը` նշեց Ասլանյանը:
Ստոմատոլոգները իրենց դիմումը ներկայացրին Շիրակի մարզպետին, ևս մեկը` ՀՀ կառավարությանը:
Շիրակի մարզպետարանում ստոմատոլոգների խմբին մարտի 5-ին ընդունեցին Շիրակի մարզպետի տեղակալ Հարություն Արշակյանն ու մարզպետարանի առողջապահության վարչության պետ Մեսրոպ Բզնունին:
Նշենք, որ ստոմատոլոգներին պարտադրում են մինչև մարտի 6-ը ներդնել էլեկտրոնային համակարգ (ցանկացած բժշկական խորհրդատվություն ու միջամտություն պետք է մուտքագրվի համակարգում), որին միանալու համար ստոմատոլոգները պետք է ամսավճար մուծեն, համակարգչային հմուտ մասնագետ պահեն, որը լրացուցիչ ծախսերի տակ կգցի նրանց։