«Իրավունքը ուժ է». Տեղեկատվության ազատության բաց ու փակ դռները

Երևանի քաղաքապետարանում տեղի ունեցած հայտնի միջադեպերից հետո քաղաքապետարանի լրատվության վարչության պետ Արթուր Գևորգյանը լրագրողներին հայտնեց, որ ավագանու մարտի 19-ի նիստից սկսած լրագրողներն իրավունք չեն ունենա ներկա գտնվել ու աշխատել նիստերի դահլիճում։ Լրատվամիջոցներին կտրամադրվի առանձին տարածք, առաջին հարկում, որտեղ կապահովվի նիստից ուղիղ հեռարձակում և ինտերնետ հասանելիություն։

Մինչ այդ ՀՀ կառավարությունն արդեն իսկ հանդես էր եկել նմանօրինակ նախաձեռնությամբ, որի համաձայն, կառավարության նիստերը ապրիլից հետո անց են կացվելու դռնփակ ռեժիմով։

Խորհրդարանի քննարկմանը ներկայացված «Կառավարության կառուցվածքի և գործունեության մասին ՀՀ օրենքի» նախագծով նախատեսվում են հետևյալ կարգավորումները.

1. «Կառավարության նիստերն արձանագրվում են վարչապետի աշխատակազմի կողմից: Նիստի արձանագրությունը կամ դրա մի մասը վարչապետի հանձնարարությամբ կարող է հրապարակվել:

2. Կառավարության նիստերը դռնփակ են: Վարչապետի որոշմամբ նիստի մի մասը կարող է անցկացվել դռնբաց:

3. Կառավարության անդամն իրավունք չունի առանց վարչապետի թույլտվության տեղեկատվություն հրապարակել Կառավարությունում քննարկված որևէ հարցի քննարկման ընթացքի մասին»:

ԶԼՄ–ների աշխատանքին վերաբերող նոր իրավական կարգավորումների, լրագրողների աշխատանքային նոր պայմանների, տեղեկատվության ազատության իրավունքի իրացման վրա դրանց հնարավոր ազդեցության մասին Sputnik Արմենիայի «Իրավունքը ուժ է» հաղորդաշարի հեղինակ Նելլի Դանիելյանը զրուցել է ԵՊՀ Ժուռնալիստիկայի ֆակուլտետի դեկան Նաղաշ Մարտիրոսյանի հետ։