ԵՐԵՎԱՆ, 2 մարտի– Sputnik. ՀՀ ԱԺ Հաշվիչ հանձնաժողովի նախագահ Գագիկ Մելիքյանը ներկայացրեց ՀՀ 4–րդ նախագահի ընտրության արդյունքները։
ԱԺ 105 պատգամավորից ՀՀ նախագահի ընտրությանը մասնակցել է 101–ը։
Քվեատուփում առկա է 101 քվեաթերթիկ։ Դրանցից մեկն անվավեր է։
Արմեն Սարգսյանի նախագահ դառնալուն կողմ է քվեարկել 90 պատգամավոր, դեմ` 10–ը։
«ՀՀ 4 նախագահ է ընտրվում Արմեն Սարգսյանը»,–հայտարարեց Գագիկ Մելիքյանը։ Լուրը պատգամավորներն ընդունեցին ծափերով։
Հիշեցնենք` Առաջին անգամ ՀՀ նախագահն ընտրվեց ոչ թե համաժողովրդական ընտրությամբ, այլ ժողովրդի ընտրյալների` ԱԺ պատգամավորների քվեարկությամբ։
ՀՀ Ազգային ՀՀԿ և ՀՅԴ խմբակցությունների 65 պատգամավորների գրավոր դիմումով Հայաստանի Հանրապետության նախագահի պաշտոնում առաջադրվել է Արմեն Վարդանի Սարգսյանը: Այս թեկնածուին կողմնակից էր նաև ընդդիմադիր «Ծառուկյան» դաշինքը։ Արմեն Սարգսյանն առաջադրված միակ թեկնածուն է։
Ընդդիմադիր «Ելք» խմբակցությունը չկարողացավ հավաքել պահանջված քանակի ստորագրությունները` իր թեկնածուին` Արտակ Զեյնալյանին առաջադրելու համար։
Հիշեցնենք` նոր Սահմանադրության համաձայն` նախագահին ընտրելու են խորհրդարանի պատգամավորները։ Իրական իշխանությունը կբաժանվի խորհրդարանի և կառավարության միջև։ Նախագահի գործառույթները զուտ ներկայացուցչական կլինեն։
Կենսագրական տվյալներ
Արմեն Սարգսյանը ծնվել է 1953թ. հունիսի 23-ին Երևանում։
Ավարտել է Երևանի պետական համալսարանի տեսական ֆիզիկայի և մաթեմատիկայի ֆակուլտետը: 1976-1984 թվականները ֆիզիկա է դասավանդել ԵՊՀ-ում, հիմնադրել է տեսական ֆիզիկայի կոմպլեքս համակարգերի համակարգչային մոդելավորման բաժինը:
ԽՍՀՄ տարիներին (1984-1985 թթ. և 1989-1991 թթ.) եղել է օտարերկրյա հետազոտող և դասախոս Քեմբրիջի համալսարանում, Լոնդոնի համալսարանի Մաթեմատիկայի ինստիտուտում:
1992-1995 թթ. Արմեն Սարգսյանը Հայաստանի դեսպանն էր Մեծ Բրիտանիայում: Միաժամանակ զբաղեցրել է Եվրոպայում Հայաստանի «ավագ դեսպանի», Եվրոպական միությունում, Բելգիայում, Նիդեռլանդներում, Լյուքսեմբուրգում և Վատիկանում դեսպանի պաշտոնները:
1996թ. նոյեմբերի 1-ին Արմեն Սարգսյանը դարձել է Հայաստանի հինգերորդ վարչապետը, սակայն պաշտոնավարել է ընդամենը չորս ամիս և 1997թ. փետրվարի 28-ին լքել պաշտոնը:
1998-2000 թթ. նա կրկին զբաղեցրել է Լոնդոնում Հայաստանի դեսպանի պաշտոնը:
2000-ից Eurasia House International կազմակերպության հիմնադիր նախագահն է:
Տարբեր տարիներին հանդիսացել է British Petrօleum, Alcatel, Telefonica եւ այլ ընկերությունների խորհրդատու:
2013թ. սեպտեմբերին Արմեն Սարգսյանը երրորդ անգամ դարձել է Միացյալ Թագավորությունում Հայաստանի դեսպանի պաշտոնը:
Անկուսակցական է։ Ամուսնացած է, ունի երկու որդի, երեք թոռ։