ԵՐԵՎԱՆ, 1 մարտի — Sputnik. Ռուսաստանցիներն ավելի հաճախ են սկսել Հայաստան գալ, ինչի վկայությունն են ՌԴ ԱԴԾ սահմանային ծառայության վիճակագրական տվյալները, գրված է Տուրօպերատորների ասոցիացիայի կայքում։
ՌԴ քաղաքացիները 2017 թվականի փետրվարի 23-ից Հայաստան են այցելում ներքին անձնագրերով (եթե ժամանեն «Զվարթնոց» և «Շիրակ» օդանավակայաններ)։ Նախորդ տարվա վիճակագրությունը ցույց է տվել, որ ռուսաստանցիների ուղևորությունների քանակը Հայաստան աճել է 20%-ով և հասել 410 հազարի։
Ռուսաստանի զբոսաշրջային օպերատորները նշում են, որ Հայաստանի նկատմամբ հետաքրքրությունն աճել է պարզեցված անձնագրային ռեժիմի շնորհիվ։
«Մուլտիտուր» ընկերության ուսումնասիրությունները ցույց են տվել, որ 2018 թվականին այդ ուղղության աճը կկազմի մինչև 25%։
«Հայաստանի նկատմամբ հետաքրքրությունը կարող է ավելացնել էքսկուրսիոն, խոհարարական և ուխտագնացության զբոսաշրջության զարգացումը», — ասում են տուրօպերատորի ներկայացուցիչները։
Միևնույն ժամանակ մեկ այլ կազմակերպությունում` «Դելֆինում», Հայաստանի հանդեպ հետաքրքրության բարձրացման գործոն են անվանել մեր երկրի մշակութային և իրադարձային մեծ ծրագիրը։ Այս տարի բազմաթիվ փառատոներ կանցկացվեն (օրինակ` Գինու օրերը մայիսի 4-5, Թթի փառատոնը` հուլիսի 7-ին, Գինու փառատոնը` հոկտեմբերի 6-ին)։ Բացի այդ, Հայաստանը տոնում է Հանրապետության 100-ամյակն ու Երևանի հիմնադրման 2800-ամյակը։
Միևնույն ժամանակ հոդվածի հեղինակները նշել են, որ Հայաստանում հանգիստն ավելի մատչելի է։ Տուրօպերատորները հաշվել են, որ հայաստանյան տուրերի տևողությունը միջինը 6-7 օր է, և դրանց միջին արժեքը 350 դոլար է կազմում։