ԵՐԵՎԱՆ, 1 մարտի — Sputnik. Հայաստանի Հանրապետական կուսակցության Գերագույն մարմնի նիստից հետո լրագրողների հետ հանդիպման ժամանակ ՀՀԿ խոսնակ, ԱԺ փոխնախագահ Էդուարդ Շարմազանովը հայտնել է, որ իշխող կուսակցությունը 2018թ. ապրիլից հետո նոր կառավարության ձևավորման հարցը դեռևս չի քննարկել:
«Երբ քննարկենք, ավարտենք, թաքուն չենք պահելու, ժողովրդին ներկայացնելու ենք: Կայացնելու ենք այնպիսի որոշում, որը բխելու է մեր պետության, մեր ազգի, անվտանգության շահերից: Սա է յուրաքանչյուր ժողովրդավարական երկրի համար բանաձևը»,- ասել է Շարմազանովը:
ՀՀԿ խոսնակը նաև խոսել է կառավարության և վարչապետի ունակությունների մասին` ասելով, որ թե մեկը և թե մյուսը պետք է ունակ լինեն լավագույնը դիմակայելու երկրի առաջ ծառացած մարտահրավերներին, ներկայացնելու Հայաստանի Հանրապետությունը ղարաբաղյան բանակցությունների ժամանակ, Ռուսաստանի Դաշնության, Իրանի, Միացյալ Նահանգների, եվրոպական կառույցների, Չինաստանի և այլ միջազգային գործընկերների հետ հարաբերություններում և ամենակարևորը՝ սպասարկելու Հայաստանի Հանրապետության շահը:
«Ինչպես պահանջի Հայաստանի Հանրապետության քաղաքացին և մեր երկրի ազգային ու պետական շահը, այնպես էլ Հանրապետական կուսակցությունը կվարվի»,- նշել է ՀՀ ԱԺ փոխնախագահը:
Շարմազանովը հիշեցրել է, որ 2017թ. ապրիլի 2-ին տեղի են ունեցել խորհրդարանական ընտրություններ, որոնց արդյունքում Սերժ Սարգսյանի գլխավորած քաղաքական ուժը հասել է հաջողության: «Մեր քաղաքացիները մինչև 2022թ., Հանրապետական կուսակցությանն են տվել կառավարություն ձևավորելու մանդատը»,- ընդգծել է նա: