ԵՐԵՎԱՆ, 27 փետրվարի — Sputnik. Իսրայելում կասեցվել է հարկահավաքումը Երուսաղեմի եկեղեցական գույքից, ինչի մասին տեղեկացնում է ՌԻԱ Նովոստին` հղում անելով երկրի վարչապետի գրասենյակին։ Հարկահավաքումը կասեցվել է Իսրայելի վարչապետ Բենիամին Նեթանյահուի և Երուսաղեմի քաղաքապետ Նիր Բարկատի համատեղ որոշմամբ։ Քաղաքական գործիչները որոշել են աշխատանքային խումբ ստեղծել ֆինանսների, արտաքին գործերի, ներքին գործերի նախարարությունների և քաղաքապետարանի ներկայացուցիչների ներգրավմամբ` քաղաքային հարկերի վերաբերյալ որոշումը ձևակերպելու համար։
Վարչապետ Բենիամին Նեթանյահուի գրասենյակի հայտարարության մեջ նշվում է, որ «լուծումը ձևակերպելու նպատակով» մասնագիտական թիմ կձևավորվի, որը եկեղեցիների ներկայացուցիչների հետ բանակցություններ կվարի»:
Նշենք, որ Երուսաղեմում կրոնական կառույցներից հարկ գանձելու որոշումը տեղի եկեղեցականների շրջանում դժգոհության էր առաջացրել։ Անցած կիրակի հույն ուղղափառ, հայկական և կաթոլիկ եկեղեցիները համատեղ որոշում էին կայացրել Երուսաղեմում Տիրոջ գերեզմանի վանքը փակելու վերաբերյալ` ի նշան հարկահավաքման դեմ բողոքի։
Վերոնշյալ եկեղեցիները, Սուրբ գերեզմանի եղբայրություն կամզելով, համատեղ կառավարում են Քրիստոսի մահապատժի, թաղման և հարության վայրում կառուցված քրիստոնեության մեծագույն սրբությունը։ Եկեղեցիները հրաժարվում են ենթարկվել աշխարհիկ իշխանությունների պահանջին` նրանց գործողությունները տասնյակ տարիների ավանդույթների խախտում և վիրավորանք համարելով։
Երուսաղեմի քաղաքապետարանի հայտարարության համաձայն` եկեղեցիներն ընդհանուր առմամբ քաղաքային բյուջեին մոտ 186 մլն դոլար են պարտք։