Սպիտակցի Հայկոյի «Մի գնա» երգը բառացիորեն «պայթեցրել» է Դուբայի ակումբներից մեկի պարահրապարակը։
Լիբանանցի հայտնի երգիչ Չադի Բասարը (Chadi Bassar) համերգից մի հատված է հրապարակել ֆեյսբուքյան իր էջում։
«Վերջին գիշերը Դուբայում։ Հայկական երգ։ Մի գնա», — տեսանյութին կից գրել է Բասարը։
Տեսանյութում երևում է, թե ինչպես է Բասարը երգում հայկական հիթը, իսկ դահլիճը ձայնակցում է նրան։
Երգիչ Սպիտակցի Հայկոյի և ռեփեր Սուպեր Սաքոյի «Մի գնա» երգը իսկական հիթ է դարձել աշխարհի շատ երկրներում։ Երգը մեգահիթ է դարձել նաև Թուրքիայում, մասնավորապես Ստամբուլի բնակիչների շրջանում։ Այս երգի տակ կանայք պորտապար են պարում, իսկ տեղի ռադիոկայաններն անընդհատ հնչեցնում են այն։
Հայկական հիթը հասել էր նաև Եգիպտոս, Իսրայել, Սաուդյան Արաբիա, Լիբիա, Վրաստան, Ռուսաստան, ԱՄԷ և Ֆրանսիա։ Ֆրանսիացի հայտնի փոփ երգիչ և ռեփեր Մետր Գիմսն այդ երգի «քավր» տարբերակն է ներկայացրել։ Տեսահոլովակը նկարել են Նյու Յորքում։
«Մի գնա» երգը ձայնագրվել է անցած տարի ռեփեր Սուպեր Սաքոյի հետ համահեղինակությամբ։ Ինչն է գերել մեր հարևաններին, դժվար է ասել, բայց կարելի է ենթադրել։ Հավանաբար, հոգեհարազատ «կլկլոցը», մի բան, ինչը թուրքերը համարում են իրենց մենաշնորհը: Համացանցում կան կադրեր, թե ինչպես է տեղի էստրադային աստղը համերգին պատրաստվելու ընթացքում «ոգեշնչվում» «Մի գնա» երգով։