ԵՐԵՎԱՆ, 19 փետրվարի — Sputnik. «Ռոսիա. Կուլտուրա» հեռուստաալիքի «Ոտքով» ծրագրի հեղինակ և հաղորդավար Միխայիլ Ժերբակն իր երկրորդ «Առաքելական Հայաստան» ֆիլմում պատմել է, թե ինչն է ամենից շատ արտասահմանցիներին զարմացնում Հայաստանում։
«Օտարերկրացիներին միշտ զարմացրել է, թե Հայաստանում որքան գրադարաններ, ձեռագրեր, գրիչներ կան։ Մի անգամ օտարերկրյա վաճառականը Դվինում հարցրել է մի հովվի` ու՞ր քշել 500 ոչխարներին։ Հովիվը պատասխանել է` սպանդանոց` մագաղաթ պատրաստելու», — պատմել է Ժերբակն իրեն հաղորդած պատմությունը։
Պարզվել է, որ այդքան ոչխարից պետք է ստացվեր մի մեծ գիրք։ Վաճառականը զարմացած հարցրել է, թե կարիք կա՞ արդյոք սովի տարիներին գրքեր գրել, ինչին հետևել է հովվի պատասխանը` առանց հացի կմահանա մարմինը, առանց գրքերի` հոգին։
Հնագույն ձեռագրերի ինստիտուտում` Մատենադարանում, պահվում են 17 հազար ձեռագիր մատյան, շուրջ երկու հազար տպագիր գիրք և 100 հազար արխիվային փաստաթուղթ։
Հեղինակը համոզված է, որ հենց հավատի և կրոնի շնորհիվ է հայերին հաջողվել փրկվել այդքան հալածանքներից, ճնշումներից և պահպանել իրենց ինքնությունը, լեզուն։
«Հավատի ամրությունը և հայրենիքի հանդեպ հավատարմությունը պահպանել են Հայաստանը», — ասում է Ժերբակը։
Ֆիլմում նա պատմում է առաքելական Հայաստանի մասին, ներկայացնում երկրի առանցքային քրիստոնեական հուշարձանները։ Ճանապարհորդությունը սկսվում է Հայաստանի նախկին մայրաքաղաքից` Վաղարշապատից (այժմ` Էջմիածին), որտեղ կառուցվել է առաջին քրիստոնեական եկեղեցին։
«Հայաստանը քրիստոնություն ընդունած առաջին երկիրն է», — ընդգծում է Ժերբակն Էջմիածնի եկեղեցու մոտ` պատմելով այն մասին, թե ինչպես է Տրդատ արքան մկրտվել։
Նա Էջմիածնի տաճարն անվանում է հայկական ճարտարապետության հանրագիտարան, որը շինարար հայերը տարածել են ամբողջ աշխարհով մեկ։
Հաղորդավարը խոսել է նաև Կոմիտասի մասին։
«Երևանյան զբոսանքս սկսում եմ Կոմիտասի հուշարձանից։ Կոմիտասը ծնվել է Թուրքիայում երաժիշտների ընտանիքում, վաղ տարիքում է որբացել և քահանան նրան Էջմիածին է տարել որպես երգիչ», — պատմում է Ժերբակը։
Կաթողիկոսի ողջույնին տղան ասել է, որ հայերեն չգիտի, սակայն կարող է երգել։ Նա հավաքել և մշակել է ժողովրդական երգերը։ 1915թ-ին երաժիշտը դարձել է հայերի ցեղասպանության ականատեսը։ Կոմիտասին փրկել են ազդեցիկ ընկերները։