ԵՐԵՎԱՆ, 19 փետրվարի — Sputnik. Երևանի քաղաքապետարանն էլեկտրական ավտոբուսներ ձեռք բերելու համար բանակցություններ է վարում բնապահպանական հիմնադրամների հետ։ Մայրաքաղաքի իշխանություններն ուզում են տրանսպորտային նոր ցանցում նոր ավտոբուսներ ներառել, ընդ որում` ոչ միայն միջին, այլև մեծ չափերի։ Այս պահին Երևանի երթուղիներում նման ավտոբուսներ չկան։
Քաղաքապետի որոշմամբ ստեղծված աշխատանքային խումբն ուսումնասիրում է բոլոր մատչելի տարբերակները, այդ թվում` սեղմված և հեղուկ գազով։ Ուսումնասիրվում են նաև էլեկտրական ավտոբուսները. թեև դրանք ավելի թանկ են, բայց սպասարկումն է ավելի էժան։
Հայաստանում նավթ ու գազ չկա, փոխարենը բավարար քանակի էլեկտրաէներգիա կա, այսինքն էլեկտրական տրանսպորտը կբարելավվի նաև էներգետիկ հավասարակշռությունը։
«Խնդրի լուծման շրջանակում ուսումնասիրվում է նաև էլեկտրական ավտոբուսների ներդրման իրագործելիության հնարավորությունը, որի հետ կապված արդեն իսկ տարվում են բանակցություններ մի շարք բնապահպանական ֆոնդերի հետ, որոնց պարագայում համագործակցության ձևաչափի, գնային քաղաքականության և այլ բաղադրիչների մասով որոշակիություն դեռևս չկա, սակայն դրանց վերջնական արդյունքների և կիրառման հնարավոր տարբերակների մասին կիրազեկվի ինչպես մասնագիտական խմբի անդամներին, այնպես էլ հանրությանը», — Sputnik Արմենիային ասացին Երևանի քաղաքապետարանից։
Երևանի քաղաքապետարանը կողմ է ցանկացած գործընթացի, որի արդյունքում հնարավոր է էականորեն ներազդել մայրաքաղաքի բնապահպանական խնդիրների դրական լուծմանը, սակայն կոնկրետ այս պարագայում անհրաժեշտ է գիտակցել նաև, որ նոր ավտոբուսների արժեքը ծախսերի ընդհանուր հաշվարկի ժամանակ հանդիսանում է վերջնական արժեքի վրա ներազդող որոշիչ գործոն։
Նշենք, որ Bloomberg New Energy Finance (BNEF) հետազոտության համաձայն` էլեկտրական ավտոբուսները դիզվառելիքով կամ սեղմված գազով աշխատողներից թանկ են, բայց համեմատաբար մատչելի են սպասարկման առումով։ 2026 թվականին այդ ավտոբուսները կկարողանան մրցել նաև մեկնարկային գնի առումով։
2025 թվականին ամբողջ աշխարհում էլեկտրական ավտոբուսների քանակը կհասնի 1,2 մլն-ի, այսինքն` երեք անգամ շատ, քան այսօր։ Աշխարհում էլեկտրաէնեգիայով կաշխատի համարյա յուրաքանչյուր երկրորդ քաղաքային ավտոբուսը։