ԵՐԵՎԱՆ, 17 փետրվարի — Sputnik. Վերջին մեկ շաբաթվա ընթացքում արձանագրված ինքնասպանություններից երկուսն առնչվում էին երևանյան միևնույն դպրոցին։ Մի դեպքում` հանգստյան օրերին ինքնասպանություն էր գործել ուսուցչուհին, իսկ երկու օր առաջ էլ հայտնի դարձավ Դավթաշենի կամրջից մոր և դստեր նետվելու մասին։ 9 տարեկան երեխան նույնպես այդ դպրոցի աշակերտուհի էր: Այս մասին գրում է «Հայկական ժամանակ» օրաթերթը։
Թերթը պարզել է, որ երեխայի մայրը ևս ժամանակին այս դպրոցում է սովորել։ Թե՛ մորը, թե՛ աղջկան բնութագրել են որպես հավասարակշռված մարդկանց։ Երրորդ դասարանում սովորող Անահիտի դասվարն ասել է. «Աշխատասեր, առաջադիմող, հավասարակշռված երեխա էր։ Դպրոց էր գալիս ժամանակին, միշտ պատրաստ էր, չի թերացել դասերում»։ Զաքարյանի խոսքով` որևէ բան չի հուշել, որ նրանց ընտանիքում կարող են անլուծելի թվացող խնդիրներ լինել։
Նա նաև նշեց, որ Անահիտի դասընկերները տեղյակ չեն կատարվածից։ Համարում են, որ նա հիվանդ է ու այդ պատճառով է բացակայում։
«Մենք ինչպե՞ս թույլ կտայինք, որ երեխաներն ապրեին այդ պահերը։ Եթե ես ցավ եմ զգում, վիշտ եմ ապրում այս ամենի համար, որ չեմ տեսնելու իմ սանուհուն, դուք պատկերացնո՞ւմ եք, եթե աշակերտներն իմանան»,- կոկորդ խեղդող հուզմունքով ասել է Զաքարյանը։
Նա նշել է, որ եթե հանկարծ իմանան, ինքը գիտի` ինչ պետք է զրուցի երեխաների հետ։
«Բայց կարծում եմ` չեն իմանա։ Այնպես եմ մտնում դասարան, որ ցույց չեմ տալիս»,- ասել է ուսուցչուհին։
Դպրոցում զայրույթ են առաջացնում տարածվող տեղեկությունները, թե Անահիտի ընտանիքն ապրում էր սոցիալապես ծանր պայմաններում, ու մայրը չի կարողացել ապահովել երեխային։
«Անահիտը միշտ հագած-կապած, սնված, ընդմիջումը հետը եկել է դպրոց։ Ո՛չ վերարկուի պակաս է ունեցել, ո՛չ ճտքավոր կոշիկի»,- ասել են դպրոցում։
Ըստ «Հայկական ժամանակի»` դպրոցում չեն շտապում հավատալ, որ կատարվածն ինքնասպանություն է։ Ընդգծել են, որ Անահիտի մայրը հավասարակշռված կին էր ու նաև ԱԻՆ աշխատակից։ «ԱԻՆ-ի աշխատողն այդքան թույլ չէր կարող լինել»,- կարծիք են հայտնել դպրոցում։
Ինչ վերաբերում է նախորդ հանգստյան օրերին ինքնասպանություն կատարած ինֆորմատիկայի ուսուցչուհուն, ՀԺ-ն տեղեկացել է, որ այստեղ նա հասցրել է աշխատել ընդամենը վեց օր։ Դեպքից երկու օր առաջ տնօրենին տեղեկացրել է, որ վատ ինքնազգացողություն ունի, չի կարող աշխատանքի գալ։