ԵՐԵՎԱՆ, 13 փետրվարի — Sputnik. Ադրբեջանի ցանկացած արձագանքը մեծացնում է Արցախի մասին պատմող ֆիլմի դիտումների քանակը։ Հայտնի բլոգեր Ալեքսանդր Լապշինն այս մասին գրել է իր բլոգում` նկատի ունենալով լատվիացի բլոգեր Ալեքսանդր Ալիմովի և նրա լիտվացի գործընկեր Ստանիսլավ Գորբունովի «Ուղևորություն դեպի Լեռնային Ղարաբաղ» ֆիլմը։
«Ավելի վատ կլիներ, եթե նրանք մեզ ընդհանրապես չարձագանքեին, քանի որ գովազդի համար մենք միջոցներ չունենք: Այդ դեպքում մեզ դժվար կլիներ պատմել Ղարաբաղի բնության ու ճարտարապետության մասին: Մի 20 մարդ կդիտեր ֆիլմը, իսկ Բաքվի հիստերիկ պահվածքից հետո այն դիտել է մոտ 100 հազար մարդ»,- գրել է Լապշինը:
Բլոգերն իր գրառումը վերնագրել է այսպես. «Հայկական լրտեսը գլխավորել է Ադրբեջանի նախարարությունը և զբաղվել Արցախի մասին ֆիլմի տարածմամբ»։
«Կարծում եմ` Ադրբեջանի` անհայտ բլոգերների նկատմամբ չափից ավելի ուշադրությունը դրական է: Նման գովազդի համար սովորաբար միլիոնավոր դոլարներ են վճարում, իսկ այստեղ բանտարկում են հայկական լրտեսին, եւ պրոցեսը գործի դրվեց: Նրանք դեռ չեն հասկանում, որ մեր մասին յուրաքանչյուր նման հրապարակում իրենց ստորացնում է, իսկ մեզ վեր բարձրացնում: Մենք հիմա բարձունքի վրա ենք»,- գրել է Լապշինը։
Լատվիացի բլոգեր Ալեքսանդր Ալիմովն ու նրա լիտվացի գործընկեր Ստանիսլավ Գորբունովի «Ուղևորություն դեպի Լեռնային Ղարաբաղ» ֆիլմը նկարահանվել է մեկ շաբաթվա ընթացքում։ Թիմը շրջել է Արցախի ամենագողտրիկ անկյուններով, շփվել է բնակչության հետ։