ԵՐԵՎԱՆ, 12 փետրվարի — Sputnik. Եվրամիության խորհրդում Բուլղարիայի նախագահությունն առաջընթաց կարձանագրի նաև Հայաստանի հետ մուտքի արտոնագրերի ազատականացման երկխոսության մեկնարկի հարցում։ Նման հույս է հայտնել Հայաստանի նախագահ Սերժ Սարգսյանը երկուշաբթի Երևանում բուլղարացի գործընկեր Ռումեն Ռադևի հետ համատեղ ճեպազրույցում։
Նա վստահեցրել է, որ Բուլղարիայի նախագահի այցը կամրապնդի երկկողմ կապերը և խթան կհանդիսանա համագործակցության խորացման համար։
Սարգսյանը նաև հույս է հայտնել, որ հայ-բուլղարական հարաբերությունները կխորանան նաև ԵՄ շրջանակում` հատկապես հաշվի առնելով այն, որ Սոֆիան դարձել է ԵՄ խորհրդի նախագահ։
«Հույս ունեմ, որ ԵՄ խորհրդում Բուլղարիայի նախագահությունը, ի թիվս այլ հարցերի, առաջընթաց կարձանագրի նաև Հայաստանի հետ մուտքի արտոնագրերի ազատականացման երկխոսության մեկնարկի հարցում», — ասել է Սարգսյանը։
Նա նշել է, որ վերջին տարիներին փոխադարձ առևտուրը զգալի աճ է արձանագրել, սակայն դրա ներուժն ավելի մեծ է։
«Գոհունակությամբ արձանագրեցինք նաև բուլղար գործարարների հետաքրքրության աճը Հայաստանում ընդլայնելու տնտեսական հնարավորությունները․ խոսքս թե՛ ԵԱՏՄ-ին Հայաստանի անդամակցության, Հայաստան-ԵՄ համագործակցության նոր դաշտի մասին է, թե՛ երկրում ստեղծվող ազատ տնտեսական գոտիներում տրամադրվող հնարավորությունների», — ասել է Սարգսյանը։
Սարգսյանը նշել է, որ Հայաստանի համար չափազանց կարևոր է իր գործընկերների աջակցությունը ԵԱՀԿ Մինսկի խմբի համանախագահների ձևաչափով ընթացող գործընթացին, ինչը համահունչ է նաև ԵՄ ընդհանուր դիրքորոշմանը։
Հայաստանի նախագահն իր բուլղարացի գործընկերոջը հրավիրել է մասնակցելու սեպտեմբերին կայանալիք Ֆրանկոֆոնիայի գագաթաժողովին։
2018թ-ի հունվարի 1-ին Բուլղարիան ստանձնել է Եվրամիության խորհրդի նախագահությունը։
Բուլղարիայի նախագահի այցի շրջանակում կողմերը ստորագրել են «Հայաստանի Հանրապետության կառավարության և Բուլղարիայի Հանրապետության կառավարության միջև գաղտնի տեղեկատվության փոխադարձ պաշտպանության մասին» համաձայնագիրը, «Հայաստանի Հանրապետության և Բուլղարիայի Հանրապետության միջև աշխատանքային միգրացիայի կանոնակարգման մասին» համաձայնագիրը, «Հայաստանի Հանրապետության կառավարության և Բուլղարիայի Հանրապետության կառավարության միջև տեղեկատվական տեխնոլոգիաների և կապի ոլորտներում համագործակցության մասին» համաձայնագիրը, «Հայաստանի Հանրապետության մշակույթի նախարարության և Բուլղարիայի Հանրապետության մշակույթի նախարարության միջև մշակույթի բնագավառում 2018-2020թթ. համագործակցության մասին» գործնական ծրագիրը:
Բուլղարիայի նախագահը փետրվարի 12-ին պետական այցով ժամանել է Հայաստան, այցը կտևի երկու օր։ Այցի շրջանակում նախագահի հետ հանդիպումից բացի նախատեսվում են հանդիպումներ Հայաստանի ԱԺ նախագահի և վարչապետի հետ։
Ռադևին Մայր աթոռ սուրբ Էջմիածնում կընդունի Ամենայն հայոց կաթողիկոս Գարեգին Բ-ն։
Պետական այցի շրջանակում Ռադևը կայցելի Մատենադարան, «Թումո» ստեղծարար տեխնոլոգիաների կենտրոն և Պեյո Յավորովի անվան №131 միջնակարգ դպրոց։
Վերջին անգամ Բուլղարիայի նախագահը Հայաստան է այցելել ավելի քան 13 տարի առաջ։ 2004թ-ին պաշտոնական այցով Հայաստան էր եկել Գեորգի Պրվանովը։