ԵՐԵՎԱՆ, 8 փետրվարի — Sputnik. Պլովդիվի հայ համայնքը քննարկում է Թուրքիայի հայկական եկեղեցուց փրկված մասունքների համար ցուցասրահ ունենալու գաղափարը, հաղորդում է Բուլղարիայի Ազգային ռադիոն։
Մասունքները` լանջախաչեր և գրքեր, ինչպես նաև գավաթներ և այլ եկեղեցական սպասք, պահվում են Պլովդիվի Սուրբ Գևորգ եկեղեցում։ Մի քանի տարի առաջ դրանք կրկին ստուգել է եկեղեցու քահանա Դանիել Քարաջյանը։
«Նա ծնվել է Պլովդիվում, սովորել Երուսաղեմում։ Շատ կիրթ քահանա է։ Ուսումնասիրել և նկարագրել է եկեղեցական պահոցը», – պատմում է Հայկական մշակութային տեղեկատվական կենտրոնի տնօրեն Աղավնի Գևորգյանը։
Այն հավաքված է 13 սնդուկներում, որոնք փախստականներն իրենց հետ բերել են Ռոդոստոյից։ Այդ հունական անվանումով քաղաքը հիմա գտնվում է Թուրքիայի եվրոպական մասում, որտեղ այն կոչվում է Թեքիրդաղ։ Մինչև Առաջին համաշխարհային պատերազմն այնտեղ ապրել են տասնյակ հազարավոր հայեր, հույներ և բուլղարացիներ, բազմաթիվ եկեղեցիներ են եղել։ Երբ հայերը փախել են Թուրքիայից, նրանք հասցրել են իրենց հետ վերցնել եկեղեցիների ունեցվածքը։
«Նրանց համար դա եղել է ամենակարևոր մաս, ինքնագիտակցության մասնիկ, առանց չափազանցության` ազգային արժեք», – ասում է Գևորգյանը։
Շատերն ապաստան են գտել ուղղափառ Բուլղարիայում, որտեղ նրանց պատրաստակամությամբ ընդունել են։
Այդ մասունքների շարքում է Սուրբ խաչի մասնիկը, բյուզանդական վարպետի նմանությամբ ստեղծված XVII դարի Աստվածածնի պատկերը, Սուրբ Նիկոլայի և Սուրբ Գեորգիի մասունքների մասեր։
Այժմ համայնքը քաղաքի իշխանությունների հետ քննարկում է ցուցասրահի գաղափարը, որտեղ հավատացյալ այցելուները դրանք դիտելու հնարավորություն կունենան։